› 選擇地區
三藩市
紐約
洛杉磯
其他美國地區
香港 台灣 北美
 
2014年05月12日

中環在線:
Easy Taxi唔攻中國 避開騰訊阿里 - 李華華

Gustavo的確後生又靚仔,似唔似巴西球星卡卡見仁見智。 謝榮耀攝

阿里巴巴與騰訊(700)早前為電召的士Apps燒錢,向乘客、司機前後補貼19億元人仔,呢種「土豪式」宣傳手法已嚇退外資,由巴西籍Gustavo Vaz創辦嘅Easy Taxi認為,內地市場太過成熟,被阿里與騰訊飲盡頭啖湯,佢唔敢進軍內地市場,寧願攻打其他亞洲市場。
年僅25歲、樣貌有些少似巴西球星卡卡嘅Gustavo接受訪問時指,中國市場的確好龐大,佢哋喺亞洲已經覆蓋11個國家或地區,包括香港、台灣、泰國、越南、韓國、印度等,冇需要打入中國,跟馬雲嘅阿里與馬化騰嘅騰訊鬥燒錢,「我哋唔會好似佢哋咁使錢。」
Easy Taxi在港除做街客生意,好快做埋B2B。Gustavo透露,計劃向上市公司提供「的士套餐」服務,方便員工搭的士後,唔使畀現金、攞收據、等claim錢咁麻煩,可以直接由公司找數;仲會提供分析報告,畀公司了解邊啲員工claim得特別多錢。佢哋亦跟八達通公司傾緊合作。
不過,香港市場競爭大,又多「85折的士」,Gustavo承認,暫時未達到收支平衡,但平均每日已經有幾千宗交易,暫時最重要係增加客戶數目,提升用戶體驗,佢又提醒大家「其實做85折的士嘅司機,要一路揸車、一路搞咁多嘢(收柯打、分配柯打)好危險!」
Easy Taxi 2011年喺巴西成立,舊年10月進軍本港市場,今年初試過喺鬧市派現金券,司機憑現金可獲回贈;唔經唔覺已經在港補貼幾百萬元。
Gustavo話,至今有22萬人次下載個Apps,共有7,000名登記的士司機,乘客主要以女性為主,因預約前可以攞到的士司機嘅姓名、相片、電話等等,預約時較安心。香港人時間就係金錢,好重視效率,佢指,的士平均五分鐘內就會接載到客人。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載