› 選擇地區
三藩市
紐約
洛杉磯
其他美國地區
香港 台灣 北美
 
2014年05月13日

金手指:不問價追中慧 - 孫柏文

鄭衡嶽任主席的中慧國際,本業大幅改善,前景亮麗。 資料圖片

舊年尾,孫柏文叫不問價追總部喺大埔科學園嘅中慧國際(1143)。當時我話神級資產負債表兼個殼冇理由值得嗰幾億元,不過最重要係佢旗下有間叫GAEMS嘅分公司做一個遊戲機嘅配件,喺最新Xbox、PlayStation 12月面世前,已成為專業打機手必備。貼之前收0.7元,跟住篇文出嗰日裂口高開至0.9元,收1.06元,之後兩周內見1.38元,不過本欄食唔晒,因喺七日後1.2元已叫落車。
過咗半年又叫不問價追,係因首先業績前回咗唔少。業績一出見本業大幅改善,海嘯時注資嘅兩間分公司開始有睇頭,連黃師傅黃瑋傑早前都用呢個分析angle講過。但今日我寫係因要講啲產品先係重點,即旗下GAEMS同TrekStor。

新打機箱勝在速度快

先講TrekStor,歐洲勁賣超平平板電腦,舊年新產品已達cult級。下半年營業額比上半年升一倍,盈利由賺幾十元變賺過千萬元。過千萬元好多咩?當佢得3.8億元市值PE得十幾倍,仲要有幾厘派息時,千萬元盈利升幅對股價影響會好大。
GAEMS呢?佢賣三百幾美元,似小型行李箱,打開時一面電視畫面,另一面裝Xbox或PS入去,一插電可玩嘅隨身打機箱。而之前賣最多係畀啲派出海外嘅美軍士兵同專業打機手。原來,呢部機除能隨身外,更吸引係玩家由㩒pad掣到畫面變嘅input lag只係8毫秒,電視最快索尼16毫秒,TCL嘅要130毫秒,慢成咁即係你打網上遊戲,個畫面未見俾人射,其實已死咗。淨係咁呢排有好多唔攞出街嘅機迷永遠喺屋企打都買部,所以舊年上半年營業額比下半半升七成達5,000幾萬元,今年升幅繼續。當然,點解呢刻追?原來當年第一份糧買部雅達利嘅十億元老炒家,兩周前話:「佢喺3月高位好難穿,不過一穿就會狂升。」咁個位喺上周五穿咗。佢舊年話1.8元先沽呢隻,不過兩周前話:「冇啦,唔沽住,起碼2.2元先!」 仲唔不問價追中慧?

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載