› 選擇地區
三藩市
紐約
洛杉磯
其他美國地區
香港 台灣 北美
 
2014年05月16日

中環迷你裙:蓋茨愛廣告植入 - Samantha

植入式廣告始終唔可以hard sell,就算請到全智賢拍劇,叫佢怒塗30秒唇膏,神劇都玩死。 資料圖片

酷派(2369)出埋「神盒」,可推算一個接一個「死唔斷氣」的黃金廣告時段將成為歷史,大氣電波競爭力再被削弱,我家老媽,除了新聞台以外,其餘時間都攬住個「盒子」唔放。都啱的,睇膠猴不如睇靚仔外星人。有電視台近年大量引入植入式廣告,高層斥通訊局對植入式廣告設限,限制收入云云。Samantha認為,植入式廣告終歸係睇「heart sell」,唔係「hard sell」,就算請到全智賢拍劇,叫佢怒塗30秒唇膏,又或者日日影住枝雞汁,神劇都玩死。
要拎個心出嚟做product placement,除了要兼顧客人感受,唔好得罪觀眾更重要,始終都係想生意好啫。相對於中港劇目,韓劇明顯做得較用心,據說在劇本成形前,劇組手上通常已有品牌清單,製劇時可根據劇本,選擇更合適劇情的品牌進行植入。當遇到受歡迎劇目,醒目觀眾早已在劇中截圖,自行在市場掃清板,根本唔需要扮演一個難纏sales的角色煩到大家眼火爆。
植入式廣告除了在韓國發揮效用,全球亦大行其道。2012年廣告商就投入83億美元,植入廣告在電視劇、電影,MV以至包裝盒上,它的魅力連全球首富蓋茨都嗒糖,他在自己成立的公司Corbis開設品牌植入部門Branded Entertainment Network,希望為品牌和媒體提供平台,找到廣告的機遇,所以只要有諗頭,商機仍然是隨手可得!

Samantha
本欄逢周三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載