› 選擇地區
三藩市
紐約
洛杉磯
其他美國地區
香港 台灣 北美
 
2014年06月23日

Trader物語:
局勢變化 不可不察 - 張士佳

近日股市淡靜,但作為投資者仍要一眼關七,留意多方面局勢及市況。

近日香港人關心嘅,一係公投,一係世界盃,而股市嘅捧場客就明顯少了。一個四年一度,另一個更係開先河,而股市就差唔多日日有,孰莊孰閒,一目了然,我自己就三樣都有留意,前兩項有各路專家研究,我都係隨口講。都係講番市,我早提出有「有形之手」的操作:君不見個市長期在高位,但又冇人真係買股票,人升我們又唔升,人跌恒指又唔跌。
講真,內地打貪升溫,長遠係好事,不過短期難免對股市帶嚟一點壓力,如果冇維穩之手在支持,港股未必企到目前位置,公投人多勢眾,我相信維穩之手很快會散開,所以我都唔敢沾手股票,如果唔買會手痕,惟有睇吓一些較受國際因素影響嘅落手。

油價衝高 吼蚊型油股

比如話,伊拉克局勢動盪,武裝部隊佔據包括輸油管道所在基爾庫克(Kirkuk)的北部地區,但美國總統奧巴馬講明,唔會派地面部隊去伊拉克,白宮好明顯唔願意再次捲入伊拉克戰爭。伊拉克係石油輸出國組織第二大產油國,緊張局勢刺激國際油價過去兩個星期急升,這些國際局勢引致嘅變化,帶來一些和中國相關性較低的因素,相關個股都見有資金炒下,算係近日悶市中嘅小小焦點。
油價升到九個月高位,油股自然受惠,中石油(857)升到今年新高,中海油(883)亦都反覆向高位逼近。不過,這些巨無霸冇可能突然間飛起,要升都係慢慢升,伊拉克局勢係咪會繼續惡化,油價係咪會繼續升,其實唔見得咁肯定,因為到油價高到咁上下,油組國自然會走出嚟話增產,美國亦會釋放戰略儲備咁,唔會容許油價飆升到影響經濟復蘇。所以,中石油、中海油這些巨無霸,雖然穩陣,但當基本面趨勢未必持久嘅時候,可能佢哋嘅升幅會唔夠位畀人轉身。

相對而言,一批小型嘅石油股,之前冇人留意,股價一直處於底部附近,現在油價升到上來,市場上亦冇啥其他焦點,咁就突然間受到留意,比如新時代能源(166)、中亞能源(850)同南海石油(076)都突然抽升上黎。
市場上唔止得呢幾隻石油股,而呢幾隻最大的相似點,大概係佢哋嘅市值都係五、六億元左右,唔會太大;其他石油股,暫時就唔見有何異動,但在世界盃期間,參與市場的資金本來就唔多,資金集中火力炒起三幾隻,合理過大包圍;所以投資者要跟,可以係見邊隻破頂就買邊隻,未行的就放在監察名單算喇。
中期嘅油價上落難測,而這些細價油股嘅基本面其實唔見得吸引,預了都係炒一轉就完,加上美國開採頁岩氣取得成功,油價難得一炒,有心人製造一個泡沫走貨也未可知,總之見勢就追,見停就走,尤其今周起秩序可能失衡,我自己都係走多過買,短炒無妨,長揸就無謂,待天時地利人和之時,才是穩勝之道。
臨尾借幾句講講公投,投唔投純屬個人決定,不過我覺得作為一個負責任的香港人,應該睇清楚投乜嘢,內容係點,再自己作決定,最低限度知道自己贊成或反對甚麼,同炒股票一樣,點都要自己做一做功課,眾人皆醉還是跟大隊,也需要有理據才有立場。

張士佳
筆者持有南海石油(076)

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載