› 選擇地區
三藩市
紐約
洛杉磯
其他美國地區
香港 台灣 北美
 
2014年06月23日

情陷夜中環:走樣 - 葉朗程

若一位太太三年間不斷肥胖,這可能會成為被丈夫拋棄的因素。 資料圖片

以下一席話,任一個男人再寡情薄幸,也未必對女人說得出口。「我見到你,直情想反胃呀!」星期四happy hour,坐在我們面前的,就正是如此一個薄情郎。昨晚,好朋友離家出走,大力關上大門之前,就是對老婆拋下這句話,然後拿起車匙,直飛到我家借宿。
十幾年死黨,借宿幾多宵不是問題,但我若無限期收留他,第日佢哋婚姻破裂,我豈不成了幫兇?絕對唔可以咁,我有義務勸他回家,但我點講佢都唔聽,是晚happy hour惟有找來另外幾位死黨幫口。多個人多把口,就算勸他不成,其餘幾位都可以輪流收留他,多幾個幫兇,自己也少一點罪孽。
薄情郎的花名是Bimao,即是用普通話讀出「鼻毛」,因為由細到大,Bimao真係有好多鼻毛。Bimao整晚重複着同一句話:「你又唔係我,你哋唔會知佢有幾難頂㗎啦。」兩夫妻住埋一齊,唔係你頂我就我頂你㗎啦,如果每次覺得難頂就要離家出走,不是很兒戲嗎?「係囉,萬事有商量嘛,離家出走,好傷感情。」死黨一號Ronald說。Bimao呷一口喜力,默然不語。

老友出走 耐人尋味

Bimao讀書好叻,數學尤其出色,畢業後第一份工就是在某保險公司做精算師。未夠一年,Bimao走咗去美國讀個master of finance,之後加入咗投資銀行做risk management。一句講晒,Bimao百分百筍盤,而有幸當我們Bimao嫂的,條件也十分不錯。「話時話,好耐都未見過阿嫂喎。」死黨二號Benson說。
突然間,Bimao好像想出甚麼主意似的。「你想見阿嫂?Good idea,我哋即刻去。」Bimao帶點醉意說。就這樣,Bimao結賬離開,強迫我們跟他一起回家。大家本只是打算做個和事老勸他幾句,沒想到Bimao竟然要我們陪他一起面對。到時候,我們幾個大男人見到阿嫂,真是十萬個尷尬。臨上的士前,Ronald代表我們作最後掙扎。「喂,你自己肯返屋企就得啦,唔使我哋陪啦,我哋見到阿嫂講乜呀?好戇居啫。」
一向口臭的Benson,突然彈出一句驚心動魄的末世預言:「算啦,陪佢啦,你睇佢個樣,我哋唔睇住佢,佢層樓聽日可能變凶宅呀。」一間屋發生命案嘅機會率有幾高?我冇計過,但我覺得好高。最大規模的保險公司,人壽危疾乜嘢「保」到有,就是沒有「凶宅保」。
就連保險公司這些超級無敵大莊家也不敢開個「凶宅保」跟你對賭,可想而知,風險真的不少。想到這裏,算吧,還是跟Bimao回家好。

「唔該,葡萄園。」Bimao跟司機說。Benson大吃一驚,連忙問個究竟:「乜嘢葡萄園呀?你唔係住司徒拔道咩?」佢搬咗兩個月啦,我說。「黐線!你唔早講?我今晚約咗人㗎。」車上沒有人理會Benson,沒多久,的士已經穿過西隧。
夜晚的葡萄園,沒有法國酒莊的氣勢,反而因為大家心裏藏着的疑團,讓這排豪宅添了一份幽深。究竟為甚麼Bimao寧願走一段山長水遠的路,也不得不半夜離家出走?我們四人下車,Bimao一個箭步走到屋前,按密碼,打開大門,其他人一步一驚心的緊隨其後。
走進華麗大廳,我們已經見到阿嫂,她一邊悠閒的看着電視,一邊細味着類似朱古力餅的東西。看清楚,是Royce的朱古力餅。阿嫂帶點愕然的看着我們,而我們也是同樣愕然的看着她。我細細聲跟Ronald和Benson說:「原來阿嫂有咗。」Ronald望着阿嫂,恍然大悟,然後爭着說:「恭喜晒阿嫂!」
阿嫂惑然,看着Ronald說:「恭喜我乜嘢?」Ronald正想回答之際,我突然覺得事有不妥,未等Ronald開口,我已經搶着補充:「梗係恭喜你哋新居入伙啦!啲裝修好elegant呀,你負責諗㗎?」阿嫂望一望Bimao,跟着坦白對我說:「梗係我諗啦,旨意佢就死得啦。」之後,阿嫂識做地迴避上房,叫我們慢慢坐。
Bimao離家出走,用一個字總結原因,就是「肥」,用兩個字總結,就是「走樣」。因為一個女人走樣而嫌棄她,我們就算身為兄弟,都覺得有點兒那過。「走樣冇問題喎,我阿媽比起佢30年前都走晒樣,肥咗30磅都有。娶個女人返嚟,我冇預佢會越嚟越靚。」Bimao說。既然你識咁諗,點解要咁嬲呢?「大哥呀,我阿媽用30年肥30磅,我老婆用3年就肥咗30磅啦。」

阿嫂增磅 速度驚人

原來,最讓他氣憤的,不是老婆走樣,而是其走樣的速度。「如果佢係生咗BB,或者身體出咗毛病,令到佢走晒樣,我真係冇所謂。但就因為佢自己任性、冇節制,而搞到自己咁,係唔係好過份呀?」Bimao說得面紅耳赤,我們其餘三個圍着茶几,你眼望我眼,不知該說甚麼。雖然有點牛頭唔搭馬嘴,但呢個氣氛,的確讓人很想說聲:「節哀順變。」
三年前,Bimao兩公婆結婚,我們幾個是兄弟。男人老狗,也為他們當天立下的結婚誓詞而感動落淚。「無論環境順逆,疾病健康」,也會「終身不渝」。現在,既不是貧,也沒有病,人家只是肥咗,就已經看人不順眼嗎?
話雖如此,另一邊廂,女的又是否完全沒有錯?結婚誓詞的另一重點,是「我會永遠愛慕你,尊重你」。尊重,好一句尊重,冇事冇幹,才芳齡26,純粹因為貪吃而暴肥30磅,那份對丈夫的尊重,看來也已經拋諸腦後。

葉朗程

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載