蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月03日
馬上成為壹會員

中環在線:鏞記第三代新店開張 
葉澍堃胡定旭挽鵝硬銷 - 李華華

四位食家主動叫師傅畀幾隻燒鵝佢哋拎住俾人影相,唔怕整污糟自己套衫,跟主人家真係老友。 林靜攝

中環鏞記第三代另起爐灶,已故第二代掌舵人甘健成二子甘崇轅喺灣仔開嘅「甘牌燒鵝」、長子甘崇軒喺北角開嘅「甘飯館」噚日先後開張。甘牌燒鵝更獲政商界「食家」畀面捧場,前高官葉澍堃、醫管局前主席胡定旭同立法會議員林健鋒一人一句硬銷力讚,認真夠朋友。

相關新聞:中環在線:藏頭詩向鏞記挑機

林健鋒蛇王去食鵝

甘牌燒鵝下晝兩點開張,四點半輪到甘飯館,甘老太、甘健成太太、甘崇軒兩兄弟同甘崇轅一對仔女都到齊兩間店嘅開張儀式,四代同堂,連埋一眾親友、熟客,逼爆兩間舖。甘崇轅同時將甘牌燒鵝門店入面一幅甘家四代同堂嘅畫作揭開,話想食店有多啲家庭溫暖感覺。
講番三位一睇身形就知道佢哋係「食家」嘅嘉賓。中午喺立法會要求放飯、驚住張華峰餓到腳軟嘅林健鋒,兩點幾出現喺甘牌食燒鵝、乳豬,但就冇帶埋張華峰,只係跟其他嘉賓爭住認係熟客。
林健鋒話鏞記三代人嘅手勢都試過,跟手仲細數鏞記歷史,話鏞記以前由邊度搬去邊度云云;旁邊嘅葉澍堃不甘示弱,話自己由20歲食到60歲,仲次次都有左髀食,跟甘健成仲曾經係乒乓雙打戰友;60歲嘅胡定旭就話食咗30幾年。
試完燒鵝、乳豬,三位又爭住賣口乖,林健鋒話食過翻尋味,胡定旭指平時自己唔食鵝皮,但噚日都食晒。最有心思似乎都係葉澍堃,話「有甘健成先生嘅味道」,不過都唔及資深電視人蔡和平一句「鏞記水平都唔夠佢哋好」直接。

李華華
mailto:LiWaWa@AppleDaily.com

【學界佔中 黃竹坑現場】YouTube 重溫:
http://bit.ly/71march

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載