蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月09日
馬上成為壹會員

智取大市:北車有好消息惡晒 - 晉佳

崔殿國(中)任主席的北車上市不久,冇蟹貨,因此較易炒上。 資料圖片

自從炒憧憬資金流入嗰浸之後,上升股份比例越嚟越低,噚日升股少過跌股,表面睇動力唔多足夠,但港股交投淡靜同時,大家都好踴躍去炒細嘢,市場氣氛唔係太差,但永遠總係只得少部份股票有得炒,指數升極升唔起,點睇都跑輸外圍股市。一句講晒,股票供應過多。
始終港股裡面有唔少股票大家一早買到飽晒,就好似內銀股咁多間,工、中、建對散戶嚟講根本冇分別,內房股就幾十間,仲有唔少排緊隊嚟香港上市,咁搞法呢啲板塊點會谷得起。
截至噚日為止,港股主板市值24.25萬億元,恒生指數就處於23541。同大約六年前嘅2008年5月底相比,恒生指數當時係24533,但同時港股市值只得18.25萬億元。明明指數六年間下跌咗4%,但係港股主板市值竟然膨脹咗32.9%,原因係呢六年嚟好多新股上市、配售新股活動,以市值計算,六年間股票供應增加咗三分之一,股票不停增加,錢就得咁多,美國退市仲有可能令到錢少咗,畀我係大戶,仲買港股嚟做乜,卒之啲錢今年上半年寧願去東南亞,君不見越南、菲律賓股市今年上半年升超過一成?
港股長期變成多數服從少數嘅遊戲,所以揀股都係跟紅頂白,最好有概念得嚟,股票供應唔多,大折讓H股隻隻都細細隻,炒幾個月都未識停,浙江世寶(1057)、洛陽玻璃(1108)都升咗超過一倍;殼股唔覺唔覺都炒咗大半個月。如果唔敢高追,就要搵新概念,鐵路股會係一個唔錯出路。
7月1日開始,中國鐵路調整運行圖,簡單啲講係調整班次,而呢次調整係2007年以嚟最大幅度。調整之後,全國鐵路開行旅客列車總數達到2,447對(一對即係來回一次),其中動車組列車1,330對。

冇蟹貨易炒上

如果調整班次密咗,按理係需要有更多鐵路車卡設備去應付,受惠嘅會係北車(6199)、南車(1766)、南車時代(3898),其中隻北車貪佢新上市,佢樓上冇蟹貨,招股時又冇乜散戶參與,較易炒上,最近四個交易日升咗14%。
北車去年以機車、動車為主嘅軌道交通設備業務營業額680億元人民幣,佔整體七成,鐵道總公司旗下企業生意佔收入接近五成,生意同鐵路國策緊密相連。北車去年市盈率14.3倍,低過南車嘅17.9倍。由於係2007年至今最大班次調整幅度,強勢唔會咁快玩完,加上市場求好消息若渴,呢隻股應有唔錯表現,中線以17倍市盈率作為目標價,上望7元。

晉佳
本欄逢周三刊登

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載