› 選擇地區
三藩市
紐約
洛杉磯
其他美國地區
香港 台灣 北美
 
2014年07月18日

中環在線:陳啓宗話教授冇料 
「讀商科嘥時間」 - 李華華

陳啓宗噚日出席論壇,話大學教授唔知道商業世界實際點運作。 朱家駿攝

恒隆地產(101)主席陳啓宗一向語不驚人誓不休,噚日佢出席理大主辦嘅亞洲教育管理高峯會議時,竟然話工商管理呢科浪費時間,又建議好多大學教授應該走出去做吓生意,或者幫企業做顧問獲取商場實戰經驗;佢言下之意,即係話教商業嘅大學教授只識得紙上談兵,完全唔知道商業世界實際點樣運作。
陳啟宗平時月旦時事政局、鬧財爺夠晒激動,估唔到佢講商業教育都可以講得好勞氣。佢憶述自己20年前曾經去過一間東南亞頂尖大學演講,佢謔稱呢間大學嘅商學院院長可能做研究就相當一流,但對實際生活情況一無所知。

無從商經驗 紙上談兵

佢認為,大部份大學教授缺乏真正從商經驗,只能傳授商業理論,未能將理論同實際商業環境結合,建議佢哋走出去做生意或者幫企業做顧問,爭取多啲實戰經驗。
雖然佢都係讀工商管理,持有美國南加州大學工商管理學碩士,仲係一讀完學位,就讀埋碩士;之不過,佢話自己讀完都唔知道做生意係乜東東,只係學到一啲技巧,佢直情覺得工商管理(BBA)呢科係浪費時間,只係好多人誤以為讀完呢科就會搵到好工。
佢認為,應該好似佢個仔咁,大學畢業後工作幾年再去讀高級管理人員工商管理碩士(EMBA),反而仲有用。講起佢32歲嘅阿仔陳文博,都係喺美國南加州大學讀書,修讀國際關係,早年入恒隆喺上海工作,前年調返香港跟董事總經理陳南祿,睇住有經驗嘅人點做去學嘢當然有效過死讀書喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載