蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月29日
馬上成為壹會員

中環在線:新一批IPO生意千奇百趣
整容捕魚股來港抽水 - 李華華

劉曉慶(左)任代言人的鵬愛在內地有14間門店,幫客戶去疤、拉皮、隆胸等等。右為創辦人之一丁文婷。

早幾年有墓園、當舖、夜場在港上市,大家已經嘖嘖稱奇,原來一山還有一山高,根據港交所(388)最新資料,幫人整容、喺大海捉吞拿魚、甚至齋賣餅乾嘅公司都話申請緊在港上市。港交所(388)打開門口做生意,真係畀廣大股民好多選擇喎!

相關新聞:中環在線:鵬愛搵曾志偉做獨董

鵬愛由劉曉慶代言

根據新規定,公司一申請上市就要將招股書初稿上載港交所網頁,上周四就有間鵬愛醫療美容集團上載招股書,正申請上市。呢間公司喺內地有14間美容機構,小至去疤,大至拉皮同隆胸,佢都有提供服務。
最巴閉係,佢由2011年就搵到年近60嘅內地女星劉曉慶做代言人,仲形容劉曉慶係「中國連續三代人都廣為熟悉的銀幕傳奇,其恒久青春的容顏……產生極大號召力」。之但係,劉曉慶成日都話自己冇整容㗎喎,即使望落皮膚唔似60,佢都話冇整容喎。

除咗整容公司,一間叫中國金槍魚產業嘅公司都申請緊上市,金槍魚即係吞拿魚,呢間公司經營24艘船,專門捕捉吞拿魚,然後賣去日本。冇睇錯呀,呢間公司有七成收益來自日本,喺日本只係賣畀東洋冷藏公司。照咁睇,唔知大家去日本食嘅吞拿魚,會唔會來自呢間中國公司呢?
仲有一間齋賣餅乾嘅嘉士利,呢間公司有成58年歷史,賣薄脆、威化、夾心餅之類,賣點之一就係歷史悠久。睇招股書先知,原來賣餅係一盤唔細嘅生意,公司舊年收入就有7.5億元人仔,但只賺7,000萬元人仔。講到尾,都係嗰句,港交所都係打開門口做生意,投資者最緊要唔好做羊生羊太。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載