› 選擇地區
三藩市
紐約
洛杉磯
其他美國地區
香港 台灣 北美
 
2014年08月07日

魚樂無窮:尋找券商股滄海遺珠 - 唐牛

包利華任主席的華富國際市值只係6億銀,又係賣盤好材料。 資料圖片

外圍壞消息一浪接一浪︰葡萄牙有銀行爆煲、阿根廷破產、烏克蘭局勢再度緊張,但中港股市食咗偉哥,硬淨到不得了。恒指下試10日線即彈,A股連續三日收高於2200大關,市底強到爆,期望低位撈貨嘅散戶,又失望而回。預計今浪突破25000大關後,將直指28000關,以為已經好樂觀,但同戰友及前輩傾開,原來唔少人估緊升穿直通車高位32000點。當年直通車冇人估到咁癲,今次滬港通嚟一次翻版,又有乜出奇。
姑勿論指數走勢如何,三大主題──券商股、資源股、改革概念股已經牛氣沖天,逢低吸納準沒錯。國泰君安(1788)中期盈利爆升1.9倍,超額完成,股價即創上市新高,現價年度化市盈率僅13.6倍,滬港通開通後,生意肯定幾何級數上升,用20倍市盈率做目標,剛好見9元,潛在升幅47%!唔好以為得個講字,有邊個估到第一上海(227),兩個星期可以喪升八成。

華富市值僅6億

另一個經典例子係華富國際(952),噚日一炮過搶高三成,但咪俾呢棍嚇窒,公司最新市值只係6億銀,加上大股東及關連人士持股逾七成,原來又係一個賣盤好材料。講明有第三者洽購嘅時富金融(510)10.6億銀,PB差不多兩倍,華富國際PB只係1.6倍,追番差價已經有兩成升幅。唔好忘記,華富最新業績轉虧為盈,兼且恢復派息,業務重上軌道,呢隻以往冇乜人提嘅券商股,隨時升價十倍!

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載