› 選擇地區
三藩市
紐約
洛杉磯
其他美國地區
香港 台灣 北美
 
2014年08月12日

女神tea time:如果我是何傲兒 - Fifi

林建岳任主席的麗新發展,會否賣殼予郭炳湘,要拭目以待。 資料圖片

何傲兒同西貢地王囝囝周子揚突閃電分手,曾為何傲兒當眾落淚嘅麗新太子林建名BB,唔知會唔會心涼呢?呢頭傳麗新賣殼畀新地(016)郭氏家族大仔郭炳湘,嗰頭就話分手,牌面睇應該冇關係嘅。但我係何傲兒,就算唔揀林建名,都要揀麗新發展(488)。
噚日因郭炳湘買殼傳聞全線炒高,但菲菲信三個字 ──未炒完。首先,麗新系真係好多債!由2012年底起,系內舉債達144億元。債務搞咗十幾年都唔掂,相信唔靠外人都好難搞得掂。其二麗展係岳少發展地產事業旗艦,郭炳湘分咗200億元身家後,投資地產項目都以合營為主,全部都未成熟,要攞到個集資平台,買麗展係最方便。至於麗展同郭炳湘已先後兩次合作投地,加埋傳聞中會注入隻殼嘅資產就係雙方合作嘅將軍澳地,買殼機會大增。其三賣殼似有迹可尋,麗新早前突玩財技,6月股東會通過削股本抵銷虧損,本來岳少都係話想恢復派息能力啫,但新聞一出,削股本行動更似係部署賣殼。
你可以話單嘢係一切傳聞,但《明報》夠膽放上A1,梗有嘢跟尾。就算未去到買殼地步,引入郭炳湘做策略夥伴,呢個概念可以有排你玩。而家麗展股價殘到爆,2007年炒港股直通車時,隻股都值0.8元。家陣滬港通就開車,再睇返其市賬率只係0.2倍咋,股價翻一番去到0.4倍唔係大想頭囉。

Fifi
http://www.facebook.com/lovefrystock
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載