› 選擇地區
三藩市
紐約
洛杉磯
其他美國地區
香港 台灣 北美
 
2014年08月12日

中環在線:李小加同上交所理事長老友
撻着滬港通 - 李華華

上海交易所理事長桂敏杰(左)前日來港與港交所行政總裁李小加會面。 設計圖片及對白

滬港通預計今年10月推行,隨着開通嘅日子越來越近,兩地監管者、券商嘅交流亦越來越頻密。據了解,上海交易所理事長桂敏杰前日來港,分別與港交所(388)行政總裁李小加與財庫局局長陳家強會面。原來桂敏杰跟李小加係老朋友,就係佢兩位兩年前一次敍舊,促成滬港通。

相關新聞:中環在線:上交所開壇本地中資券商唔吼

兩年前敍舊傾出構思

桂敏杰2012年擔任上交所理事長之前,大約有10年時間喺中國證監會工作,而李小加2009年先至加盟港交所,之前佢喺美林同埋摩根大通做賓架,李小加就係做賓架時,幫不同內地公司申請上市、做「刁」時認識喺中證監工作嘅桂敏杰。
聞說,桂、李二人兩年前一次敍舊,講東講西講到打通兩地水喉,咁就出現滬港通嘅初步構思,滬港兩地相關嘅工作人員之後經過無數次嘅秘密商談,就成為快將開通嘅滬港通喇。都說中國人做生意,最講「關係」呢兩個字,識人真係十分之重要。

桂敏杰與陳家強會面

桂敏杰前日亦特別來港,除咗與李小加開會,另外一個節目就係跟陳家強會面,都係傾滬港通相關事宜。
上交所亦有一班高層已經在港,準備跟一班本地券商傾談港人投資A股嘅情況。
李小加喺滬港通呢件事上面,的確十分出力,個市炒到㷫烚烚,佢都仲怕大家唔明白,前日又將中港市場比喻為兩種形狀嘅水管,話滬港通正好係連接轉換器,佢又打算喺未來一兩個月,通過網誌回答投資者有關滬港通嘅提問。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載