› 選擇地區
三藩市
紐約
洛杉磯
其他美國地區
香港 台灣 北美
 
2014年08月13日

【收市閒情】
炒股壓力大 靚仔都變無能

【收市閒情】阿春的暗戀日記-Banker的誤會

2014年7月22日(二) 晴

隔籬組新嚟嗰個Team Head Leon,睇樣係幾好嘅,要知道呢間ibank入面,冇咩邊幾個真係有banker樣,你估真係個個係Leonardo Dicaprio咩?但我好肯定,佢襯得起Leon呢個名。

之前聽到好多人講,佢對班細好惡,成日發火,個個都叫佢「火屎Leon」。本來對佢印象麻麻。不過…嘻嘻…今日佢其中一個𡃁-阿Ken,自己行路唔帶眼,撞落我杯咖啡度,之後仲要勁鬧我。

我 又冇膽鬼,只係頭耷耷,唔敢反駁佢。點知目擊事發經過嘅Leon,竟然幫我講說話,狂抦阿Ken,鬧到對眼突晒出來,拍晒枱咁!搞到阿Ken要死死地氣同 我Say Sorry。我咁大個女,都未試過有人為我出頭,好有韓劇英雄救美感覺呢(笑)!我呢粒小薯,點解佢對我咁好?Leon仲要係公司明日之星呢!唔好諗啦, 聽日買杯咖啡俾佢飲多謝佢先。

2014年月7月2日(三) 晴

今日拎杯咖啡俾佢時,佢同我講咗句:「真係好,噚晚又瞓唔 到,呢杯咖啡救我一命。」言下之意,咁我咪佢救命恩人?(笑)傾落先知原來佢晚晚又睇美股,又上港交所Mon住有咩通告,搞到成日失眠。呢個男人又叻、又 上進,佢返工真係全程投入架!有次食飯行過佢後面,見到佢Keep住望住手機個報價,一路食,一路望。一個覺得,以事業為重嘅男人係最有型的;男人專心做 嘢事個樣,亦係最吸引的,這是宇宙不變定律。

2014年月7月30日(三) 晴

知道Leon成日唔好瞓同埋口乾,今日順 手煲咗啲湯俾佢飲(真係順手)。點知佢同我講多謝時,塊面竟然紅晒,手都震埋。佢好奇怪架,成日同佢講咗兩句,就話要去Washroom,唔通怕醜唔敢同 我講嘢?我都明嘅,一個男人,就算對住堆數字有幾叻都好;對住自己鍾意嘅人,都會不知所措嘅,應該係正常反應吧。Leon真係好鬼可愛豬架啫。

聽Elaine講,佢感情比白紙更白,自入行都冇女朋友。呢行嘅男人,一晚閒閒地走幾場,不過聽講佢次次去玩,最多只會飲嘢,一定唔會曳曳。點解一個咁優質嘅男人,竟然會冇女朋友?唔通佢好似都敏俊咁係外星人,識女朋友會病?

2014年8月8日(五) 陰

好擔心好擔心!今日晏畫見Leon面色蒼白,即刻WhatsApp佢問佢咩事,佢話頭痛,晏啲去睇醫生。早排先寫話佢識女朋友會病,今日就痛到睇醫生,都係我害咗佢(哭),下次講唔吉利嘢,真係要touch wood。唔知醫生講咩呢?

***

Leon: 醫生呀醫生,最近我真係好唔對路,經常失眠、心跳手震,成日頭痛,覺得口乾。最慘係脾氣好暴躁,成日想冇嘢搵嘢去鬧,好似上次我「厚多士」,竟然幫個女同 事阿咩春出氣。呢個跟本唔係我,照計正常嘅我,係冇可能會理一個咁豬兜嘅女仔,而我當時只係一心一意,想搵人去鬧…

醫生:仲有冇咩其他唔妥地方?

Leon:有呀有呀,我…我尿頻…仲有…

醫生:仲有呢?

Leon:我…唔得

醫生:綜合你嘅職業,生活習慣同徵狀估計。你係由於近來股市波幅太大,炒股太大壓力,以致出現包括「性無能」此等焦慮症徵狀。



《青談3分鐘》早幾日請咗著名精神科醫生曾繁光,佢就話炒股太緊張,嚴重者真係會出現上述徵狀!想知更多有關「股民焦慮症」問題,同埋解決方法,請密切留意《青談3分鐘》。

by千頌C@堆填區
http://fb.com/winbigwok

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載