› 選擇地區
三藩市
紐約
洛杉磯
其他美國地區
香港 台灣 北美
 
2014年08月13日

智取大市:暢捷通重上水面唔難 - 晉佳

王文京任主席的暢捷通主要客戶為內地小微企業,受惠於定向降準。 資料圖片

噚日講到半新股可以留意,提過吓暢捷通(1588),股價噚日升3.6%,今日就講吓佢嘅基本因素。
暢捷通係內地用友軟件旗下經營小微企業應用軟件嘅附屬。阿媽用友,簡單啲講,係香港上市公司金蝶(268)嘅對手。不過,用友嚿年收入係金蝶嘅2.5倍,規模大得多,盈利能力相對金蝶亦係好啲。論用友嘅品牌,可以用內地老字號嚟形容。

受惠定向降準

暢捷通喺2005年成立,專攻細公司商業軟件。前幾年內地中小企一直處於捱打狀態,競爭力低啲都執得就執,亦影響咗暢捷通生意,近幾年收入都冇乜增長,2013年同2011年比較,收入增幅差唔多係零,盈利喺2011年係1.27億元人民幣,2013年就1.2億元人民幣,計埋人仔滙價變動,盈利表現喺兩年間微跌,但觀乎公司面對內地差勁嘅中小企經營環境,盤數只輕微跑輸用友,冇話明顯倒退已經算叻仔。

近年中央政策偏向扶助小微企業,近年終於有新招,第一炮係定向降準,只要三農、小微企業貸款比例達到一定水平,內銀就可以獲得降準,多家內銀因此可以受惠。政策落到嚟,銀行始終要借多啲畀小微企業度難關,亦變相幫咗以小微企業客戶為主嘅暢捷通。
暢捷通嘅軟件產品,分開幾個型號,舊款產品T1、T3、T6收入嚿年都倒退,原因係公司力谷新軟件產品T+。T+係配合雲端服務嘅產品,嚿年錄得收入3,650萬元人民幣,增長2.6倍,首購用戶數字由2012年1,193名增加至9,193名,未來肯定取締其他產品。新產品亦令純利率由2012年嘅36%,提升至嚿年嘅38.5%,預計今年純利率會進一步擴闊。用友喺A股上市,估值偏貴,市盈率成38倍,至於暢捷通,歷史市盈率只有22倍。不過,暢捷通未來比起阿媽更受惠國策,理論上前景更佳,顯得暢捷通更抵買。

暢捷通6月上市招股價16.38元,論質地唔應該低過招股價咁慘情,怪就怪招股時有一批偽hedge fund走去盲搶新股,之後搞到找唔到數,上市後被逼掟殘隻股。不過,上咗市都個幾月,街上殘貨亦相信收得七七八八,到而家都未認真炒過,睇嚟要上番招股價樓上係遲早問題,現價買入,中短線以招股價樓上10%作為目標價,可睇18元,跌破14.5、14元分注止蝕。
如果要睇大size嘅股,不妨留意吓東方海外(316),航運股噚日轉強,東方海外業績後一升再升尤見利害,睇圖同成交相信有一輪短線重估潮,上番50蚊不過份。

晉佳
本欄逢周三刊登

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載