蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年08月15日
馬上成為壹會員

中環在線:放棄贊助體操隊
李寧剖白:我很痛苦! - 李華華

李寧噚日眉頭幾乎冇鬆開過,見者心酸。 朱家駿攝

男人最痛係乜?「體操王子」李寧可以話你知。李寧(2331)早前痛失合作長達12年嘅中國體操隊贊助,佢本人噚日出席業績會時,愁眉深鎖,主動提起失去贊助呢件傷心事,好感慨咁話,主動放棄贊助呢個決定,對佢個人嚟講係「很痛苦」!
新一代本土體育品牌「一哥」安踏(2020)早前從李寧手上取得中國體操隊贊助,無計啦,安踏業務已經重拾升軌,但李寧仲喺轉型嘅陣痛當中,上半年仍然蝕錢,自然樣樣都要慳住使。

基金股東:肯放棄「很感動」

貴為體操王子嘅李寧,形容體操已經係佢生命嘅一部份,自己喺體壇嘅成就都係由體操隊一手培養。但為公司利益着想,希望將有限資源,用番喺公司專注嘅五項核心運動業務當中,「所以不得不這樣做,很痛苦」、「我是承受巨大的壓力」。李寧真情流露講出呢番話時,華華喺現場,真心聽得出當中嘅苦澀。
李寧喺業績會餘下時間,表現得比平日安靜,眉頭幾乎冇鬆開過。至於私募基金股東TPG代表、公司副主席金珍君,就話對於李寧肯放棄贊助,覺得「很感動」。佢重申,失去體操贊助,對公司業務冇乜影響,未來資源會集中喺籃球、跑步及羽毛球等核心業務。
李寧為轉型,上半年繼續燒錢投資喺業務平台,開零售店,令負債比率急升至55%。管理層坦言,會評估有冇集資需要,如果有需要就再研究用銀行貸款還是股本融資。睇落李寧公司嘅財政狀況依然幾掹掹緊。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載