› 選擇地區
三藩市
紐約
洛杉磯
其他美國地區
香港 台灣 北美
 
2014年08月21日

魚樂無窮:東江集團異動惹遐想 - 唐牛

恒指連續兩日企穩25000樓上收市,霸氣十足,有趣嘅地方係,強勢股如地產股、友邦(1299)、港交所(388)開行turbo外,連公用股都按捺不住,兩電一煤齊創52周新高。睇真啲,中電(002)同電能(006)股息率分別有3.8及3.5厘,喺超低息環境下,其實吸引到暈,惹來資金掃貨變得理所當然。

早排提過永利地產(864)異常強勢,噚日終於發力,一升仲要係三成,破晒頂!爆升過後,最新市值依然得5億銀,加上PB未夠0.6倍,仲未到戲肉。CW Group(1322)再創新高,主要有兩個催化劑。一、鐵定下周五(29日)放榜,有炒業績憧憬;二、申銀首度推介,建議買入,目標價3.22元。正式進入冇蟹貨區,短線目標先睇3蚊,有貨嘅戰友繼續坐定定。

街貨少 掃起話咁易

今日推介半新股東江集團(2283),又係近日突然發力,惹人遐想。公司為內地一站式注塑解決方案供應商,主要從事注塑模具及組件設計及製作,性質與億和(838)相似。以製作注塑模具收入計算,東江喺內地市佔率排第二,產品用途廣泛,細至手機配件,大至汽車家電,可謂大小通吃。公司賣點一個字講晒︰平!雖然已連升兩棍,但歷史市盈率僅5.4倍,與市場估值脫軌。事實上,大股東連同相關人士,持貨超過七成,計埋基金暗手持倉,街貨隨時只得一、兩億,要掃起話都冇咁易,喺下星期四放榜前突然異動,話唔定有好消息跟尾,值得關注。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載