› 選擇地區
三藩市
紐約
洛杉磯
其他美國地區
香港 台灣 北美
 
2014年08月21日

中環在線:黃光裕變黃金戰士
豪言每年蝕一億都要大搞金舖 - 李華華

有消息透露,黃光裕計劃大舉進軍黃金零售市場。 設計圖片

國美(493)大股東黃光裕仍喺獄中服刑,估唔到都仲可以有新搞作。《第一財經日報》引述一名聲稱在國美控股公司、即國美集團(黃光裕私人持有)有絕對權威嘅消息人士話,國美集團計劃大舉進軍黃金零售市場,要3年內贏到呢個市場,仲話每年蝕1億人仔都冇問題!

北京開旗艦店

大家冇聽錯,即係就算3年蝕3億人仔,都要打贏呢場仗。報道引述消息人士話,國美集團旗下賣金嘅多邊金都,已經喺北京三環公主墳附近,租咗個3,500平方米嘅大舖,攞嚟做大搞黃金零售市場嘅旗艦店,仲揚言好快就會喺北京開第二間,之後就會喺全國急速開舖添;繼續沿用國美嘅必殺技,用平價奪取市場。
大嗱嗱每年蝕1億人仔,集團邊個夠power落呢個指令?報道揣測,可誇下海口每年蝕咁多錢都冇問題,成個集團應該只得一個人咁有power,大股東黃光裕是也。若屬實,即係佢由電器界人見人怕嘅「價格屠夫」,變成「黃金戰士」。
黃生搞私人生意得唔得?睇番佢往績就唔係咁樂觀。好似國美曾經進軍過香港電器零售市場,最後係敗走收場,香港業務就係國美集團所擁有嘅;國美集團亦曾經高調進軍過運動產品零售行業,惟最後都係冇咗影,所以佢搞黃金零售,唔係話一定掂。
話分兩頭,理論上仲坐緊監嘅黃先生忽然咁高調,係咪有乜嘢玄機?

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載