› 選擇地區
三藩市
紐約
洛杉磯
其他美國地區
香港 台灣 北美
 
2014年08月26日

一周三件:金利豐肥仔水 - 錢雋

澳門博彩業經歷對上兩年地區爆炸式增長,澳門博彩毛收入基數高。

金利豐(1031)食住港、澳大茶飯,嚟緊日子,應該繼續肥仔水,趁股價調整到近半年低,有得諗。
金利豐係人稱「殼后」朱太嘅旗艦,除咗香港證券業,亦主打濠江酒店同博彩業,雙頭馬車併行。前邊一瓣證券業,金利豐喺今年3月年結打後,食正中、港大升市,加埋朱太魚缸地位,唔憂冇生意。嚟緊日子,兼有滬港通力撐,照理,繼續掂檔。

雙頭馬車互補長短

後邊澳門博彩業,經歷對上兩年地區爆炸式增長,澳門博彩毛收入基數高。所以,今年成個行頭正係處於整固期,好正常。仲要咁睇,正正因為金利豐有雙頭馬車,可以互補長短。
再講,澳門係內地唯一一個可以搞娛樂博彩業地區,係獨市生意,照計,亦應該長做長有,冇有好怕。
又呢轉券商股炒到甩轆時,金利豐仍係半年橫行區上落,現價(0.86元)嘅PB,得0.64倍,券商同博彩業行家當中,又係至平選擇之一。
再講,睇番對上嗰三年度,金利豐嚟自酒店同埋博彩業嘅分部溢利,去到4.8億、3.7億同4.4億元,酒店博彩業,實在大有條件嚟搞分拆,隱藏價值一浮面,金利豐NAV唔止呢個水位,PB肯定會仲低。
又2011年,集團前身仲係叫黃金集團嗰時,獲朱太注入金利豐證券業,收購代價當中,包括發行42億元可換股票據,每股兌換價係講緊0.8元,同金利豐現價差無幾。朱太食開大茶飯,相信唔志在幾個斗零價。
金利豐有唔錯PB墊底,兼有得煲佢搞分拆,當股價升番上博彩業價值,仲未浮面前嘅NAV1.3元,金利豐現價係講緊要翻半番。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載