› 選擇地區
三藩市
紐約
洛杉磯
其他美國地區
香港 台灣 北美
 
2014年08月26日

中環在線:入股未獲批 孫宏斌現身「打氣」
融創踩入綠城主場 - 李華華

融創孫宏斌(左)分享入主綠城後嘅大計,綠城CEO壽柏年(中)變咗大配角。 馮健鏗攝

上市公司業績會一般都係非常公式化,綠城中國(3900)噚日嘅中期業績發佈會,竟然安排融創中國(1918)董事長孫宏斌做神秘嘉賓,仲取消埋業績簡介,一開波就殺入問答環節,為融創計劃收購綠城創辦人宋衛平手上24.3%股權一事解畫。照咁睇,孫總未正式入主綠城已經主導緊成件事,應該仲好緊張㖭喎。

同宋衛平份屬老友

話說宋衛平同孫宏斌一向私交甚篤,所以市場傳聞證監會裁定佢哋係「一致行動人士」,令呢單刁遲遲未放行。睇番單刁,融創斥資約60億元收購綠城24.3%,再加上宋衛平本身持有10.5%,加埋有34.8%,就會去到30%全面收購觸發點,令融創嘅收購成本升至過百億元。
孫宏斌噚日強調,現身綠城嘅主場,只係為撐「哥們兒」,想幫綠城「打打氣」,又話一早就知道有「一致行動人士」呢一關,反駁指融創跟綠城係兩間獨立運作嘅公司,因此,佢從來冇諗過會被認定為一致行動人士,仲好有信心交易最終可以獲得證監會批准,唔會放棄綠城股權咁話。
雖然收購未搞掂,孫宏斌又未正式入主綠城,但係佢已經滿腹大計,透露將會與綠城合作發展上海、北京等一線城市嘅住宅項目,並會保持產品質量,繼續主打高檔房地產路線。

壽柏年料交易提早完成

坐喺孫宏斌旁邊、淪為大配角嘅綠城副主席兼行政總裁壽柏年,就補充多兩句,叫大家唔使作各種猜測,指有關推測冇乜依據,佢又估計交易能夠提前喺12月前完成。
其實朋友係咪可以買對方股份呢?2005年,鄭裕彤嘅新世界發展(017)計劃配股以攤薄對沖基金TCI嘅持股量,當時傳聞恒地(012)主席李兆基打算認購,以幫助好友鄭裕彤,但證監會最後以兩人份屬好友,並有生意往來為由,視佢哋係一致行動人士,令四叔最終冇機會入飛。
證監會否為融創開綠燈仲係未知數,孫總話唔會放棄綠城股權,若然證監真係唔批,或者可以考慮買少啲或買晒佢囉。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載