› 選擇地區
三藩市
紐約
洛杉磯
其他美國地區
香港 台灣 北美
 
2014年09月29日

中環在線:賓架學「深水埗明哥」
德銀向基層派飯 - 李華華

一班義工團隊將整好嘅飯盒運去深水埗、元朗及屯門等地區。

香港嘅貧富懸殊問題越嚟越嚴重,德銀亞太區證券主管Dixit Joshi就「睇唔過眼」,自發夥拍多個慈善團體、學校、政府單位合作,上周舉行為期七日嘅「施惠日(Sewa Day)」,鼓勵一班賓架同事,帶同親戚朋友唔好淨係捐錢,要身體力行做義工,花時間了解香港嘅社會問題。
只係嚟咗香港四年嘅Dixit就話,香港其中一個最嚴重嘅問題係財富不均,商業區嘅繁榮根本唔可以反映社會實況,要深入社群先可以體會更深;佢又話,施惠日嘅賣點係多元化,畀大家選擇鍾意做嘅義工活動,大致分為食物與資源餽贈、戶外活動體驗、教育輔導、環境與動物權益、音樂藝術分享等等,而施惠日自2010年起,已經喺超過25個國家或地區舉行,包括英國、新加坡及香港等,去年義工總數已經達到7.5萬人。

相關新聞:中環在線:80後banker離職幫細路

準備1,500個印度版飯盒

單計上周六、日,施惠日總共舉辦二十幾項活動,仲學足「深水埗明哥」,舉行大型派飯活動,準備咗1,500個印度版飯盒,運去深水埗、元朗、屯門等地區。Dixit又話,施惠日嘅受惠對象不分種族界限,不論本地、少數族裔都會一律關心。
Dixit覺得,雖然香港已經有好多慈善團隊,但需要做嘅,仲有更多。而講到最深刻、最感動嘅體會,Dixit就提到有一次,義工隊將煮好嘅飯盒運入新界,送畀有80幾歲嘅老人家之後,班老人家突然攞出自家種新鮮蔬菜,送返畀義工隊。佢覺得呢班老人家未必擁有好多財富,但佢哋咁做,絕對重己重人。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載