蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年09月29日
馬上成為壹會員

Trader物語:妖 - 張士佳

七月十四日已過,萬聖節又未到,但不知何解市況及周圍瀰漫着一股妖氣。

明明過咗七月十四日都一段日子,萬聖節又未到,但唔知點解周圍瀰漫着一股妖氣,佔中反佔中,場大戲都唔知點收科,越來越似我上星期的預測。大市都已經跌到七個一皮,不過若見到一支像樣陽燭,其高位被另一支陽燭升穿,我都會博見底,等了那麼久,跌到那麼殘,這一浪只要能反彈上24600,都有足夠水位去追。
大市妖氣沖天,細價股更是不遑多讓,大市連日下跌,唔少個股都瘋狂照升,十足十A股市場:基本因素越虛無,幻想指數就越高,估值越可以不着邊際。
還記得行內有句話:「每個年代都有一隻妖股」。1997金融風暴前,有光大一門五傑,科技泡沫時有蛇吞象的電盈(008);金融海嘯前有超人出貨的中國遠洋(1919);海嘯後有凌駕於天圖佈局的蒙古能源(276);時至今日,大家就將中國天然氣(931)封為當代妖股。其實,妖股沒有公認的定義,但我亂咁定,就認為必先要經歷一段約十倍的急升,之後又跌番到未升之前的起步點,經歷「南柯一夢」,方有資格叫妖股。

中國天然氣僅屬半妖股

依此判斷,中國天然氣暫只能算係半妖股或候選妖股,因為它只有前半嘅升勢,未有跌回起步點。中國天然氣咁紅,相信同佢老闆簡志堅有關。炒得股耐既一定認識簡氏:潤中(202)、中國燃氣(384)、大中華實業(431)、中盈(766)、匯多利(607),當中唔少都符合以上定義,難怪投資者預期中國天然氣最終會位列仙班(妖與仙其實都幾難分)。
中國天然氣簽十份協議全部沒有法律約束力,LNG業務都未發展,更何況簡生精於財技,唔太熱衷經營,隨時好似中國燃氣咁賣畀專業營運公司,得八個員工係好正常。這些妖股,雖然有機會令人損手,但確實有陣顯赫的升勢,帶挈唔少人發達;要炒這些股,最重要係識於微時,但上周就肯定唔係微時。雖然,跌完這一浪,下浪反彈肯定和味,但無番一招半式,就勸你睇少隻,因為風高浪急,唔啱業餘人士,他日我再刀頭舔血之時,再與大家分享。
與其事後孔明,不如向前看其他有潛力的,譬如停牌六年,去年底復牌的匯多利,雖然股份已由簡生手上轉到季昌群,但唔使估賣殼,純炒注資及壯大,復牌日收0.26元,執筆時收0.405元,上得唔算多,要炒大把條件,而上周中國天然氣大跌,都冇大受拖累,唔買都可以睇睇。
近日工業殼炒到癲,但其實工業股唔啱賣殼,因為工人多、庫存多、應收賬多,唔易吸引新買家,要博我情願博地產殼,因為內地地產巨企買殼最爽手,但若殼本身唔係類似行業,強行注入,監管機構冇咁易放行,所以地產殼係最搶手亦賣得最貴。我以前介紹過一隻值得博賣殼的地產股,同系又唔只一隻殼,市值6億幾,但手上的物業都值8、9億元,8億元加殼價5億元,都已經13億元,但現在只係賣緊6億元,加上地產近日升溫,揸住的物業唔怕無人吼,一個唔覺意賣番畀舊殼主,就係一隻絕世空殼,仲要街貨得兩成,可以講倍升機會大到暈。當然,同中國天然氣嘅升幅差太遠,但風險系數低得多,所以我都買咗呢隻等收錢。吓?乜冧巴?咁就要大家做做功課喇,唔好睇專欄當做咗先得㗎!我明白大家現在乜反應嘅,標題寫咗啦!

張士佳

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載