› 選擇地區
三藩市
紐約
洛杉磯
其他美國地區
香港 台灣 北美
 
2014年10月03日

魚樂無窮:三個板塊勿亂博反彈 - 唐牛

港股第三季臨尾香,埋單倒跌1.1%,總結首三季恒指暫跌1.6%,如同白做。不過,身邊戰友荷包依然有進賬,何解?懂得炒股不炒市嘅硬道理也!由年初新經濟股喪炒,年中舊經濟股翻生、滬港通概念起飛,到近期殼股異軍突起,相關板塊完全不受大市左右,自動波開行turbo,是但扑中一瓣,依然有利可圖。
展望今季,不明朗指數達十粒星。689政府未肯回應市民訴求,佔中運動隨時要長期作戰;儲局本月完成最後一輪減買債計劃,未來息口走勢成為焦點;滬港通如箭在弦,加上歐央行快將啟動QE,卻有望成為後市𥌓光。情況就好似過年食盤菜咁,一味餸緊扣另一味餸,未食到最後都唔知是龍是蛇。

地產股恐步零售股後塵

前輩教落,要贏錢先要學識唔好輸,點先可以保本?盡量避開令你損手嘅板塊,零售股同濠賭股就係最好例子。兩者嘅處境好相似,股價同早已透支行業好景。
如今天氣不似預期,當然難敵地心吸力。牛氣全消下,加上可見將來都冇回勇催化劑,好聽啲就係有反彈冇升幅,衰啲講句就係博唔到反彈就立即中伏。銀娛(027)、金沙(1928)、周大福(1929)、佐丹奴(709)幅幅圖都係45度角向下,睇見都唔開胃。另一個有機會步兩者後塵嘅板塊就係地產股,有指佔中會拖冧樓價,有利潤在手者當然先沽為敬,強如長實(001)都要下試250日線,樣衰到爆,戰友忍手為上。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載