› 選擇地區
三藩市
紐約
洛杉磯
其他美國地區
香港 台灣 北美
 
2014年10月06日

魚樂無窮:如果時光倒流到沙士 - 唐牛

2003年沙士突襲香港,當時個個人心惶惶,搶口罩、漂白水成為指定動作,㩒𨋢都要隔住塊透明膠布。手上有乜最大鑊?就係股票同樓,人人不問價沽貨,輸到七孔流血都在所不計,沙士疫區淘大花園,賣幾十萬都乏人問津。時至今日,樓價貴到正常人買唔到,劏房成為主流,大家就咒罵地產商聯手推高樓價,政府助紂為虐,民怨沸騰。
機會曾經出現過,能否把握就視乎大家嘅洞察力,成功失敗只在一線之差。今時今日,正正就係香港人爭取真普選嘅最佳時機。689用假普選試圖迷惑市民,一心諗住交埋呢份功課畀阿爺,連任就萬無一失。但聰明嘅香港人,老早就睇穿呢個糖衣陷阱,日以繼夜、夜以繼日留守各區和平抗爭,為嘅就係香港嘅未來。

和平抗爭 唔要假普選

還有,當年畀群眾力量踢落台嘅掃把頭,又話有興趣參選特首,2017年假普選餐單正式曝光——A餐係咖喱味屎,B餐係屎味咖喱,唔通C餐會有鮑參翅肚你食?「有票,真係唔要」嘅口號,恐怕會變成「有屎,焗住要食」。屎,我寧願留畀選委慢慢品嚐。
個個都話如果時光倒流到沙士,一定會喪掃股樓,我唔希望若干年後聽到有人話如果去番2014年,一定會上街抗爭。到時,一切都變得太遲,世上亦冇咁多如果。
是日心情沉重,不談股票,附圖為昨日見報投資導航嘅第四季推介,有興趣嘅戰友請上網重溫。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載