蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月14日
馬上成為壹會員

金手指:我已經清倉! - 孫柏文

筆者感覺有危機將發生,特別是美股,將會在數周內出現大調整。 資料圖片

雖然有好多嘢想講,但股市太多事,入正題。孫柏文首先要話嘅係,我有感覺特別係美股,將會喺數周內出現大調整,甚至股災,因為所有條件已齊。論貴唔貴,美股係貴,不過唔係破紀錄嗰隻貴(美股喺87股災時,其實同而家差不多,即係平過2000年好多)。不過,近年托美股托得最厲害嘅因素,就係企業回購股份,呢個勢似完。因為近年佢哋趁低息,不斷借錢去買自己嘅股票,但就算國債利息係咁跌,佢哋發債嘅息率反升,令回購股份購買力嘅資金鏈開始斷裂。

伊波拉恐變黑天鵝

呢個情況出現係因為量化寬鬆印鈔結束,故大家睇到嘅係美元不斷升。老早已經有人話聯儲局會靠出口術耐不耐托市,但最令我擔心嘅係,上周中聯儲局真係出口術話「市場高估加息速度」托高個市後,效力得一日,之後又係咁跌。近年啲美國信貸又出現咗2007年前啲怪象,即完全唔應該借到錢嘅人又能大量借錢,又令應該借到錢嘅人借凸。即係又萬事俱備。黑天鵝仲有伊波拉,如果市場喺未來數周反映年底全球擴散機會,會點?
仲有,大家能睇得透大陸嗎?雅居樂(3383)主席都唔得閒聽電話?當然,可以係咩周永康因素,不過可能係資不抵債風暴來臨。連大陸遍地開商場嘅恒隆地產(011)都忽然賣倉底啲君臨天下單位,搞乜?點部署?我自己除咗啲攞咗出來長揸嘅股票同個別牛證外(因為睇錯,原來市升番都有得止咳),已經清倉。而家淨係得聯儲局重啟量化寬鬆再印先可阻止。
最後,要交代早幾個禮拜叫大家不問價追嘅酷派(2369)同彩星玩具(869)。我自己喺上個禮拜,當佢跌穿兼喺今年新低位收市時,被止蝕,被重創。我對大陸4G概念都仲係極樂觀。不過當酷派股價有咁嘅走勢時,極有可能間公司有啲嘢我係唔知。我對彩星玩具反而樂觀,不過美股如果冧市,佢一定一齊落,候機再入。留得青山在,那怕冇仇報?

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載