蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月30日
馬上成為壹會員

Prof J財技特訓班:齊追蹤魔法股 - 徐燦傑

王維基任主席的香港電視,11月中開台,股民要睇實佢點變。 資料圖片

呢個星期出外工作睇項目,但心繫股市,周一嗰日,有好多報道話滬通開通無期,好多朋友都驚到放晒貨,點知周二又升咗成三百幾點,一早講咗無限期係中國人口硬心軟講法,老竇鬧完個仔咪又𠱁返佢!不過,股市真係好似過山車咁,似哥哥金曲「愛慕」歌詞:「不知點算好!」真係唔知點入貨先至好!

香港電視睇王維基表演

成日都講我係炒股唔炒市,上周同大家講完捉妖股,今次Prof J講到隻魔法股,點解叫做魔法股,就係估你唔到,你以為佢會升,佢又唔升,你以為佢會跌,佢繼續又爆上,點都唔畀你估到!
第一隻魔法股香港電視(1137),上年大家以為無得睇香港電視,點知半個月前香港電視話會喺11月中用OTT(Over-The-Top)形式推出免費電視頻道,粉絲終於等到啦!各位可以用小米盒子或者透過上網收睇電視節目例如「警界線」等,而部份劇集廣告收費每15秒更加去到70萬元,有冇咁勁!
如果廣告收入穩定,好大機會幫香港電視收入轉虧為盈,另外與時並進更加大搞網購,啱時段啱channel!正!仲有樣嘢,就係佢公司市值得23億元,揸現金都有20億元,同美亞(391)、美國Netflix嘅40億元比仲差一截!王主席作為香港科技行業始祖,又係中大EMBA畢業生(與Prof J同門),板斧無理由咁少,大家一齊留意呢次王主席旗艦店神奇魔法嘅轉變!
另一隻魔法股梗係協鑫新能源(451),兩個月前個陣股價只係1.8元左右,點知而家越升越有,周二嗰陣更加升到5.33元,升咗差唔多兩倍,呢隻魔法股上周三宣佈咗股份拆細,面值0.01666元嘅現有已發行同埋未發行股份,拆細四股變成面值1/240元嘅股份。拆細之後,每股股份嘅面值會大大減少,股份買賣嘅流動性提升,相信會更容易炒上去,大家繼續一錘定音,追蹤Prof J魔法股系統,出發!

徐燦傑
齊魯國際控股首席策略總監
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載