› 選擇地區
三藩市
紐約
洛杉磯
其他美國地區
香港 台灣 北美
 
2014年11月11日

板塊尋寶:給炒股老表的一封信 - 王昇

老表:
收到你短訊,指對下周一開通的滬港通熱切期待,事關你話係大陸追睇TVB劇集《使徒行者》,其中一幕是主角炒股,一星期就可以由100萬元速賺600萬元,因為港股沒有漲停牌機制,可以升到痴線,問我有冇心水股介紹。
老表,雖然同你唔太熟,但亦有必要話你知實際情況。由100萬元炒到600萬元,的確有真實個案,但多數是股仔、莊家股一類高風險股票,捫心自問,你何德何能,可能聽到消息提前入場呢。
港股沒有漲停牌,也沒有跌停板,而一般都係跌到PK,然後拉閘放狗。你話唔怕,因為你懶醒話,一開波可以買賣的港股通股票只有266隻,相信應該都係穩陣兼大大隻的。為了老表你,我對266隻所謂「穩陣」「大價股」統計一番,結果嚇了我一跳,然後得啖笑。
266隻港股通股份,超過一半今年迄今竟報跌,表現最差的一隻叫合生元(1112),即係你個仔飲開果隻「洋」奶粉,今年頭股價70蚊樓上,宜家17蚊有找,跌幅76%。你投資100萬元落這隻「正股」,現在只值24萬元。買A股輸得慘,買港股一樣可以輸甩褲。
你可能以為只是冰山一角,但輸鑊金的港股通股票,何止一隻。十隻最PK的港股通股票,跌幅最少都有35%。很多隻都同你息息相關,包括你住緊層樓的發展商:雅居樂(3383),老闆被失蹤,股價插水五成。另外,你嚟香港都會幫襯的莎莎(178),以為生意好,但股價都跌了41%。你去澳門賭錢進貢,以為賭王賺好多,但隻隻濠賭股都跌到一仆一碌,澳博(880)今年唔見了四成。
買股票,最重要是消息接收具透明度。在消息半封鎖的大陸,大部分壞消息被和諧,就算是公司出事,香港曝了光,喺內地可能都被過濾得一乾兩淨。舉個例子,去年中有傳媒直擊,A股第一牛股茅台用邋遢水釀製,但內地傳媒卻完全隻字不提,結果茅台跌吓跌吓,至今仍未見底。
試想想,你買的一隻港股通股票出事,翌日本港股民收到料,立即拋棄,但你可能戇居居唔知發生甚麼事,這樣的情況你覺得公平嗎。我知道這番說話你可能聽不入耳,但起碼我溫提了你,橫掂老表你有的是錢,來港交下學費,接些火棒也是常識吧。

王昇
https://www.facebook.com/stockwing1
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載