› 選擇地區
三藩市
紐約
洛杉磯
其他美國地區
香港 台灣 北美
 
2014年11月11日

中環在線:超人試食人造漢堡
由植物提煉 讚不可思議 - 李華華

Impossible創辦人Patrick(右)特登帶埋人造漢堡搵李嘉誠試味。

「一世人未入過廚房」嘅「超人」李嘉誠,早前為私人公司維港投資(Horizons Ventures)入股嘅人造蛋商破例下廚炒蛋,查實除咗投資人造蛋,超人3年前仲投資咗一間研製人造肉類嘅科技食品公司Impossible。創辦人Patrick Brown早幾日專登帶咗塊人造漢堡畀超人試食,超人試完大讚「不可思議」!
Patrick早幾日去北京出席有關糧食嘅論壇之後,路過香港,就帶埋公司最新研製嘅漢堡,搵超人試味。呢塊漢堡嘅成本大概係10蚊美金,由菠菜、小麥同大豆嘅分子提煉出嚟,仲加入植物嘅血紅素,血紅素正正就可以令塊漢堡有肉香味。今次行程,Patrick仲帶埋佢研發嘅人造芝士,夾埋人造漢堡,成為一個漢堡包畀超人試,可謂誠意之作。
華華噚日亦有份試食呢個漢堡包,無論係芝士定係漢堡嘅質感,都同一般漢堡包冇乜分別。

相關新聞:中環在線:搞以色列團 教學生Startup

改良階段 或一年後登場

味道方面,漢堡雖然有肉香,但咬落始終唔及真正漢堡咁juicy惹味,食落似有豆腐味,多過肉味;不過咁,成塊漢堡都係由植物製成,零膽固醇,確係夠晒健康;至於塊人造芝士,華華就略嫌少咗啲奶羶味。
人造漢堡仲處於試驗同改良階段,𠵱家呢款一定要全熟,經過改良後,話唔定將來可以有得揀幾多成熟嘅漢堡;提煉成份亦可能有變。Patrick希望一年後可將人造漢堡推出市場,第一步先喺美國市場推出,未定賣幾多錢㗎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載