› 選擇地區
三藩市
紐約
洛杉磯
其他美國地區
香港 台灣 北美
 
2014年11月11日

金手指:歡迎同胞翻牆 - 孫柏文

內地資訊封鎖,股民要知道真的資訊,無疑要積極地日日翻牆。 資料圖片

通車了,真係要諗後果了。呢幾個禮拜,孫柏文一路諗唔通嘅地方,我亦要再講多次,但好彩嘅地方,就係呢個諗唔通嘅位衍生咗一啲投資概念。聽啲老人家講,喺1987年10月某個星期二早上,啲新加坡經紀如常起身返工,點知一開市,就見啲鬼佬不問價沽貨。開頭幾分鐘不知幾開心,諗住大平賣執平貨,點知問真啲先知原來幾個鐘頭前喺花旗國發生股災。啲陀地經紀知道乜事後,已輸錢輸到喊。

資訊封鎖遺禍

新加坡人唔知嘅原因係因為政府當時諗住好威,將CNN標籤成「不友善傳媒體」,故唔准佢哋落地播放。當年冇CNN你就唔知發生乜事。喺滬港通落實之後嗰日,點解無啦啦講歷史?原因係當有批人冇法接受所有資訊時,佢哋資金調配一定會比啲有資訊嘅人冇咁有效率,即係會輸錢。就算知,不過慢啲知,都會出事。
我喺到諗,《蘋果》為賀滬港通通車,就喺下周一準備定一啲獨家新聞,一嘢大大力踢郁某間大陸股民都可以買嘅股份。你作為股民,見到異動股,當然想知點解。喺香港當然就係上網,而當你喺discuss、高登等都冇答案時,就會同自己講:「內幕料。」亦同時間可能妒忌啲可以先知先覺先買賣嘅front run人。
而家滬港通,又遇上大陸大支嘢咁玩資訊封鎖,全香港都係可以先知先覺先買賣,揸正牌front run。問題係,佢可以翻牆?係。咁即係中共政權提供經濟誘因叫人積極地、日日地翻牆!仲要人性好怪,禁書先係好書,禁刊先信得過。
噚日有《大紀元》記者打電話畀我,我同佢話,你想多啲人睇你啲「全球公審江澤民」洗腦式message,個財經版郁到個市就得。因為就算你覺得佢完全係歪理BS大話,佢郁到個市你就算唔信都要睇要知。如果連《大紀元》都可能受惠,壹傳媒(282)、港台又點呢?
最後我都要話:「熱烈歡迎國內同胞翻牆閱讀本專欄!」

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載