› 選擇地區
三藩市
紐約
洛杉磯
其他美國地區
香港 台灣 北美
 
2014年11月18日

魚樂無窮:皓天另類滬港通概念 - 唐牛

皓天專營大陸公司,行內知名度極高。圖為公司主席劉天倪。  資料圖片

滬港通首日,上演一幕反高潮。滬股通額度一如預期用盡,相反,港股通全日成交20億人仔唔夠,足以令大市四腳朝天。A股股民熱情不似預期,諗住買定貨派畀表叔嘅香港股民,開波見勢色唔對,梗係急急腳掟貨,結果造成人踩人局面,港交所(388)、騰訊(700)、大折讓H股、中港券商股,通通變成向下跌嘅刀。
聽戰友報料,有經紀連點樣落A股盤都未知,散戶對北上掃貨反應亦非常冷淡,除反映股民需時適應外,亦顯示計劃推出是何其倉卒。如何增加股民投入感?靠監管機構投資者教育?相信會事倍功半。

盈利五連升 息率六厘

相反,財經公關作為公司與股民嘅溝通橋樑,有計仔!中港上市公司希望提高知名度之餘,股民亦希望多認識兩地公司,尋找投資機會,財經公關未來在滬港通上嘅角色更形重要,本港上市唯一嘅財經公關皓天(1260),準備迎接大茶飯!
齋講基本因素,皓天絕對唔失禮,近五年盈利都有增長,息率更高達6厘,進可攻退可守,手頭現金4.9億,相當於市值逾三成,屬現金牛一族。公司專湊大陸客,行內知名度極高,未來有滬股通同港股通兩條大水喉射住,不得了!本周四將公佈中期業績,話唔定有大計出,最新市盈率僅10倍,值得用真金白銀支持。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載