› 選擇地區
三藩市
紐約
洛杉磯
其他美國地區
香港 台灣 北美
 
2014年11月26日

中環在線:
羅寶文搵古仔 捧愛犬做明星 - 李華華

羅寶文係愛狗之人,仲為咗啲寶貝狗拍微電影。

富豪國際(078)太子女羅寶文(Poman)出名係愛狗之人,特別係佢隻寶貝犬Bodhi,佢除咗幫Bodhi變成卡通品牌,仲重金禮聘古天樂、陳慧琳拍微電影,Bodhi喺電影入面擔當重要角色,Poman似乎想借古、陳二人捧紅佢隻愛犬咁話喎。
Poman話,搵古天樂與陳慧琳拍呢套微電影,因為佢兩位形象正面,佢又大讚古天樂經常低調參與好多慈善活動,佢一直想同古仔合作。而陳慧琳就一向有合作開,所以佢都好樂於參與呢部微電影。

古天樂收太貴 曾打消念頭

查實Poman幾年前已經諗過搵古仔做宣傳,不過對方開價太高,令佢打消念頭。唔通古仔今次肯減價,還是佢𠵱家做咗集團副主席,更願意花錢做宣傳?
講番呢套微電影,片名係《幸福夢》,劇情大概係講科技可以點樣拉近人與人之間嘅距離,但係過份沉迷又會令彼此關係疏離。古、陳二人喺戲中飾演溫馨小夫妻,陳慧琳係女強人,古仔就係追夢者,仲創造咗Bodhi呢個品牌,𠱁對方開心,戲中會成日見到Bodhi嘅毛公仔出鏡㗎。
呢套微電影,片長大約5分鐘,前後拍攝兩日,𠵱家仲有一組戲未拍,目標喺農曆新年播出街,會喺香港、中國嘅視頻網站免費播放。Poman嘅2014年真係好旺,除咗接棒出任富豪副主席兼董事總經理,近日仲獲選世界傑青,佢本周五就會飛去德國攞獎,希望佢明年一樣咁旺喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載