› 選擇地區
三藩市
紐約
洛杉磯
其他美國地區
香港 台灣 北美
 
2014年11月26日

一周三件:世界集團夠細 - 錢雋

世界集團市值不足3億元,街貨市值僅1.5億元左右,有被投資者相中做變身股嘅潛質。 互聯網

呢期魚缸水向下流,細市值或者禾桿冚珍珠嘅冷灶,炒到甩轆。場內世界集團(713)市值真細小,得3億元咁大把,兼且符合禾桿冚珍珠格。
場內搵殼股熱潮,喺上星期到家陣,舉凡細市值嘅股份,好似永保林業(723)同雅天妮(789),試過單日倍升。其他長期瞓覺股,好似大同機械(118)、鱷魚恤(122)、星光集團(403)以及東南國際(726)等等,一樣挾到飛起。睇返世界集團,市值2.97億元,扣咗大股東嘅權益,街貨市值更只得1.5億元左右,有俾投資者相中做變身股嘅潛質。

深圳土儲具爆發力

排除呢個可能,世界集團家陣揸住位於深圳市平山工業土儲,佔地74萬平方呎,據規劃內容,呢批舊廠房用地,會轉變為商住項目。對上兩年度(12月結)年報,無提過,但到咗今年半年度嘅成績單,世界集團舊事重提,項目兼且獲深圳市政府批准為「2014年深圳市城市更新單元計劃」當中嘅第一批計劃。呢壇製作,有機會火速前進。
吸引嘅係,土儲以往以廠房價入賬,勁豐厚價值一直冇反映過。更何況係,呢批土儲,相距廈深高鐵深圳東站,只有2,500米路程,兼食住成個深圳前海工程,好有計。
同其他好多工業股一樣,世界集團家陣PB得0.3倍,殘到爆,若果上邊廠房價值係咁意反映,世界集團PB隨時跌到得0.2倍或以下,即係現價(0.43元)只係NAV一折幾有售。
再講,世界集團呢期開多條回收廚餘,呢壇製作,食住環保概念需求,本小利大,北望神州,有勁大發展空間,世界順風順水,會係另一個翻身財路。呢轉冷灶煲世界,當翻半番到0.65元計數,PB仲係得0.45倍。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載