› 選擇地區
三藩市
紐約
洛杉磯
其他美國地區
香港 台灣 北美
 
2014年12月01日

Trader物語:
大股上市 主責維穩 - 張士佳

中廣核電力上周招股,估計凍結資金1,500億元左右,料港股上升動力欠奉。 資料圖片

受人民銀行下調存貸利率消息刺激,以及上周五內地傳明年初成立存保制帶動,內險股、內房股及中小型內銀股大幅抽升,推動恒指上周升2.35%,收23987點,算係唔錯。不過如果拎去同上證綜合指數比較,就會非常失色,因為滬綜指收報2682點,全周升幅達7.88%,比恒指嘅升幅多兩倍幾,上周五更有7,000億元以上成交。至於後市,我認為再向上機會大,現時好友仍然控制大局,冇理由唔食埋先走,12月應該有嘢睇吓。如果想捕捉內地A股升浪,華夏滬深300(3188)係唔錯嘅選擇,因為包括嘅行業夠廣,而且幅圖又靚。
上周四內地最大純核能電企中廣核(1816)公開招股,集資最多245億元,無論國際配售或公開認購反應都係幾年來少有嘅火熱。聽聞有基金為咗爭取多啲貨,一早計好數撥出全公司現金去抽,而多間中小型證券行於首日早上已宣佈已用爆孖展額,有機會總額逾1,000億元。

中廣核凍資勁 大市難爆升

首先,我認為任何投資者同炒友點都要入飛抽一抽,點都要有啲貨底。雖然唔少人將佢歸類為新能源板塊,但相比太陽能、風電、水電等,核能唔係有錢就有得玩,非常不同。因為要擁有重要嘅核發電技術,唔係簡單透過收購合併,或者幾年時間做研發就可獲得,即係其他人想進入這個市場,係難過登天。所以中廣核更似1997年上市嘅中移動(941),上市時已經好大間,有一定嘅壟斷地位,有盈利能力。上市只係為咗配合國家未來嘅大興土木計劃,借用市場力量去加快發展,同埋令企業文化與國際接軌,成為「出口高鐵」後,另一大型技術輸出項目。因此估計其他核電相關企業,如中國核工業集團未來都會來港上市,形成一個核電板塊。更樂觀嘅推測係,核電板塊有機會成為下一浪大牛市嘅領袖股之一。當然見識過2011年日本311地震後,因海嘯令福島核電廠爆炸,為日本帶來嘅災難,就要理解經營核電廠可能幾十年都會冇事,但一有事嘅時候,可能就立即total loss,所以中廣核點都要有啲,但又唔好瞓身。
另外就係中廣核凍結咗市場大量資金,保守估計1,500億元走唔甩,相當於港股一日有多嘅成交金額,進取估計3,000億元都有可能,差唔多等於一個星期成交。市場咁多流動資金被鎖死,要炒上去隨時會唔夠氣,扯吓扯吓,可能要等認購資金回籠,先儲足力量去突破都唔奇,所以未來幾日都要睇實有幾多錢被凍結咗。
綜合以上形勢,A股向上無懸念,7,000億元成交非同小可,港股勢弱,只係被動上升,但係大跌機會微,加上為大型上市公司護航,衰極有限,然資金凍結了一大截,上升動力欠奉,所以我選擇的投資工具係sell put,如果再精準一點,係應該sell近價put,再sell遠價call,在拉牛上樹中的港股中圖利。

張士佳
註:筆者持有華夏滬深300指數ETF。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載