› 選擇地區
三藩市
紐約
洛杉磯
其他美國地區
香港 台灣 北美
 
2014年12月01日

每日一趣:得罪國資委下場 - 李可強

一間公司要上市,理應如實披露財務數據,但如果會因此得罪阿爺,後果會點? 資料圖片

一間公司要上市,理應如實披露財務數據,但如果會因此得罪阿爺,後果會點?金逸影視上周五俾中證監終止IPO,似乎已經為呢個有中國特色嘅問題提供答案。
故事教訓就係,公司要成功上市,數據真假唔緊要,最緊要係識做。但由此可推論,內地新股的數據有幾堅,就大家心照。
呢間金逸影視真係好勇,竟然夠膽喺招股書內披露國家機密,話武漢國資委喺2011年,係公司第五大客戶,總共買咗96萬元戲飛。
武漢國資委只有75名職員,即係話,平均每人使咗過萬人仔嘅公數,係用嚟睇戲。而家內地反貪腐風頭火勢,如果呢啲舊賬被揭出嚟,咁仲得了?
武漢國資委一定唔認數,寫咗信去中證監話資料失實,要求嚴肅處理。金逸影視亦知道大鑊,馬上公開道歉,話只係將武漢國資委體系內單位銷售計入其名下,過於簡化,會深刻反省。
招股書要券商、會計師、律師核查,照計應該唔會錯。但話知你啲數真定假,激嬲咗阿爺,點會有好下場?金逸影視喺內地有114間戲院,而家要擔心嘅,恐怕唔係上唔上到市咁簡單。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載