› 選擇地區
三藩市
紐約
洛杉磯
其他美國地區
香港 台灣 北美
 
2014年12月10日

智取大市:短線瘋狂中國先做到 - 晉佳

俄羅斯盧布滙價近期大幅波動,人民幣又連續兩日走低,宏觀環境睇起上嚟好似危危乎,滬股通額度更一度超過100%,證明外資掟貨,令到噚日內地A股終於出現減息以嚟最大跌市,滬綜指收市跌5.4%,其實由高位計,指數跌咗成7.5%。
畢竟星期一滬綜指9日RSI能夠上到96.6,短線瘋狂市況可以話喺主要股市近代史之中甚為少見,真係中國模式先做得到。噚日跌市就令指標一口氣由96.6跌到去65.6,理論上係一個急劇調整,未確認見頂下跌,如果一下子明顯跌破中軸,例如再跌到去45左右,先至確認到A股情緒急轉直下,升市玩完。A股短線係咪玩完,可能今日就揭盅,如果金融股全線再跌停,好大機會形成恐慌性拋售,到時冇得唔棄械投降,如果成手金融股,今日再遇到大跌市,就點都要止賺。
反之,如果拗腰升番,大家又會覺得調整完成,連一批原本驚超買嘅技術派都趁破旗衝入,即係個party會開得比之前更大,到時回報三成真係唔少得,隨時癲過之前。呢個位要撈貨博有多一轉,真係要有整個持倉輸一成止蝕嘅心理準備。

建築設備股成焦點

揀股方面,可以先回顧番上個星期一,當日恒指收市跌620點,個股跌勢當然冇噚日咁恐怖,但當日一眾金融股跌幅3%至5%,相比之前金融股單日升一成嘅強勢,調整幅度算細。結果係一批金融股上星期一已經見底,之後連升一周,券商股中信証券(6030)五日累積升五成。
至於噚日,個別建築設備股升完頭也不回,龍工(3339)、中聯重科(1157)升半成以上,A股方面,有做水利工程嘅中國電建升停板之後復牌,但大跌市升幅只收窄至4%,證明呢個板塊似足上星期一嘅金融股,如果A股未死得,呢兩日就係基建、建築設備股最後召集。點解基建同建築設備股得?原因市傳中央經濟工作會議將會重點提到「一帶一路」,呢個由噚日開到星期四,呢批股就可能成為本周重點。
股份方面,龍工可以望多兩眼,佢本身從事裝載機業務,由於內房市道轉弱,令建築行業近年放緩,加上應收賬偏高,所以股價跌到谷底,但年度化市盈率8倍,估值低殘,而家有埋國策扶持,上升水位充足。龍工股價年初至今形成大圓底,噚日剛剛突破頸線,大跌市仍大升7%頭也不回,強勢實在值得尊重,如果A股仲有得升,龍工2蚊冇走雞。

晉佳
http://www.facebook.com/pages/ 晉佳/719009541518415
本欄逢周三刊登

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載