› 選擇地區
三藩市
紐約
洛杉磯
其他美國地區
香港 台灣 北美
 
2014年12月10日

中環在線:情深高歌《悲秋風》
陳德霖處女唱 - 李華華

陳德霖大唱七十年代粵語金曲《悲秋風》,歌藝唔錯喎。

高官時興唱歌搞氣氛,最出名當然係有「官場技安」之稱嘅平機會主席周一嶽,商務及經濟發展局局長蘇錦樑亦曾自彈自唱,估唔到連一向唔多出聲嘅金管局總裁陳德霖(Norman)亦玩埋一份,噚日喺每年一度嘅傳媒聖誕聚會,處女下海,一展歌喉,而且係高音準、中音靚,造藝不凡㗎。

近期頻展示軟實力

陳總噚日唱咗三首歌,頭兩隻,陳總同傳媒朋友夾檔合唱,包括張學友、湯寶如嘅《相思風雨中》,同埋鄧麗君嘅《月亮代表我的心》。不過,講到陳總嘅飲歌,睇怕非最後一首,佢親自點唱七十年代鄭少秋嘅粵語金曲《悲秋風》莫屬。
呢首歌由佢夥拍該局助理總裁(機構拓展及營運)陳維民一齊唱,當在場人士都頴晒頭,唔知「悲秋風,碎春夢」係乜東東之際,外號「攞命」嘅Norman已經幾乎倒背如流,唔使望住字幕就可以自由奔放咁高歌,睇嚟似係有備而戰,應該仲係連沖涼位都唔放過,經過密集式訓練嘅結果。
陳總近期頻頻展示軟實力,繼早前喺中大崇基學院畢業禮,發表青年時期挫折嘅有heart勵志演講後,今次再慷慨獻藝,都算突破。
據賓架界話,未聞陳總公開唱歌,連財資市場公會周年晚宴,即使同業及金管局中人輪流上台表演,佢都未露過一手。舊年傳媒聖誕聯歡,陳總亦只係同大家玩遊戲,鬥摺飛機,估唔到今年佢老哥雅興大發,看來唱歌先係佢杯茶。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載