› 選擇地區
三藩市
紐約
洛杉磯
其他美國地區
香港 台灣 北美
 
2014年12月23日

一周三件:華電褔新好抵 - 錢雋

華電褔新受惠中國的新能源發展國策,前景可看高一線。 互聯網

華電褔新(816)一季調整咗30%過外,當公用股瓣數,呢個幅度認真唔講得嘢少,預測PE又係同級股當中,至吸引嘅一隻,當要趁機收集。
華電褔新嘅阿媽華電國際(1071),同級數有華能新能源(958)、其阿媽華能國電(902),仲有大唐新能源(1798)及其阿媽大唐發電(991)。場內專業嘅評估,華電褔新今、明年度預測11倍PE同8倍PE,上邊兩家股份,華能新能源明年11倍、大唐新能源去到17倍。三大國企相關環保股,華電褔新PE水位最吸引。又滬港通有得買賣股份嘅龍源新能源(916),明年PE更加上到14倍,華電褔新係折讓咗42%!

受惠國策前景看俏

再睇吓前景,國務院啱啱喺11月尾再定調,確定了「七大工程包」,當中,清潔能源榜上有名。又祖國報載,發改委發言人話,即使經濟增長而帶動能源消耗,但到2030年,新增消耗,亦都可以通過可再生能源解決。
又國際風電權威Globaldata就預期,去到2020年,風電市場規模會達到1,160億元,係2008年時嘅五倍!而當中,又以祖國佔大多數。諗到嘅係,阿爺堅持走環保國策,減低煤炭火電利用,提高環保潔能使用,此消彼長下,包括風電在內行業,長線已經有運行,更何況,華電褔新有位勁有實力嘅大股東!
又華電褔新剛啱喺月頭完成配售4.28億股H股,每股講緊4.01元,集團經呢期調整,現價(3.24元)仲要平過大孖沙承配人嘅入市價錢。
買華電褔新,當上番華能新能源明年11倍PE水位計,都要升37%到4.5元。又祖國環保潔能市場有睇得見靚仔前景,老老實實,呢個目標PE水位,都仲係好抵搞。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載