› 選擇地區
三藩市
紐約
洛杉磯
其他美國地區
香港 台灣 北美
 
2014年12月23日

女神tea time:阿信屋係霸權? - Fifi

CEC國際半年多賺32%。圖為集團主席林偉駿。 資料圖片

CEC國際(759)出半年業績,講盈利的話,半年多賺32%;收益亦按年增約33%,算係交到數。不過相信大家對大數都冇乜興趣,主要集中力都係阿信屋,份業績嘅最大亮點,就係透露公司會進一步開新業務,最新搞作係「759麵包工房」。在下覺得,有趣嘅事唔係佢賣乜,而係網民反應。大家一如既往,每次聽到佢有新搞作,就即時反應話:「759搞霸權!」
以事論事,乜叫霸權先?根據一般認知,以超市為例,泛指大財團連鎖超市,持自己市場份額大,一係合謀定價,再唔係就威脅供應商,打壓小商戶。首先,公道啲,而家暫時未聽過阿信屋有以上不道德行動。其二係,只要你睇番份業績,你就知阿信屋毛利率34%,比去年微跌0.5百分點,主要因為租金成本上升;至於經營溢利率得3.4%,即係100蚊先賺你3.4元。由此可見,公司毛利率政策一如過往,唔存在食水深咗或賤價賣貨搶客問題,實在睇唔到霸道個位喺邊?反而業績提到,公司入錯大路貨,搞到減價散貨都冇人要。菲菲問過林老闆,好似雞精嗰啲咁,入咗先發現啲客係唔會喺阿信屋買呢類周街買到嘅貨品,痛定思痛後,就肯定阿信屋宗旨係「人有我唔可以有」,意味之後會主力走偏門貨,百佳、惠康唔會係直接競爭者。走得咁偏,唔通仲有資格做霸權?

Fifi
http://www.facebook.com/lovefrystock
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載