› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

一周三件:遠展放眼世界 - 錢雋

遠東發展早已向外地發展,賣個滿堂紅。圖為地產發展部總經理朱寶林。  資料圖片

遠東發展(035)喺環球各地賣樓賣到盤滿砵滿,未來四年,每年坐底10億元銷售入賬,肥過肥仔水。
遠展呢幾年向外發展,除咗中港兩地,喺澳洲房產發展亦一帆風順,主打當地樓盤Midtown at Upper West Side, 仲有The Fifth,賣個滿堂紅,總預售收入36億元。連埋中港同馬拉,樓盤預售銷售額,達到54.2億元,已經超過遠展家陣市值約50億元。

預售物業肥仔水

遠展放眼世界嘅策略,比起同級數本地薑地產股有遠見,同有好好成績。呢批預售物業,將會喺2015到2018年入賬,兼好平均每年有起碼10億元入賬,遠展嚟緊幾年成績單,肯定有睇頭。
遠展喺今年上半年度,再購入鄰近倫敦金絲雀碼頭嘅Manilla Street地盤,亦訂立協議收購澳洲柏斯Elizabeth Quay地盤。倫敦金絲雀碼頭,被譽為當地新地標,國際級酒店好似希爾頓、萬豪同四季等等林立。家陣祖國富豪,唔一定添置香江豪宅,而係走出外邊,添置海外房產,澳洲同英國就係佢哋心儀地區。食住呢條水,遠展仲唔肥仔水?
今年中,報章引述《華爾街日報》載,遠展同彤叔旗下周大褔(1929),夥拍澳洲博彩公司Echo Entertainment,競投布里斯本一個新賭場度假村開發權,明年初確定中標結果。呢壇製作,若果順利中標,遠展又多個博彩業concept,身價又有唔同睇法。
咪扯咁遠,遠展單係上邊售樓反映,好保守計數已經可以為集團帶嚟每股0.8元利潤。重新秤一秤,遠展NAV上到10蚊,現價2.7元,PB只得0.26倍,流晒口水。煲遠展,當PB收窄到0.5倍計數,已經見5蚊,潛在回報率係翻一番,上邊Echo Entertainment嘅PB講緊1.07倍。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載