› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

每日一趣:令計劃又衰違紀 - 李可強

內地官媒公佈又有一隻老虎落網,佢就係中共嘅大內總管令計劃。  資料圖片

星期一晚,大家趕住返屋企做冬嘅時候,大陸官媒就公佈又有一隻老虎落網,佢就係中共嘅大內總管令計劃,乜原因?佢哋呢啲高層畀人查,衰嚟衰去咪又係涉嫌嚴重違紀,其實乜係嚴重違紀呢?咪就係違紀行為已經超過一般限度囉,唔係嘅話邊得嚟嚴重。
你可能會覺得:「唓!咁咪即係無講過嘢!」個市大跌嗰時,啲人都鍾意用「期指相關沽盤拖累」嚟解釋跌市原因。其實,理由呢啲嘢,識用,一定係咁用!令計劃被查之前職位係中共中央統戰部部長,即係大內總管,佢連同薄熙來、周永康同埋徐才厚係新四人幫,咁佢點解俾人查?明晒!
不過作為香港人,如果係第一次認識佢嘅,大部份都會畀佢個名吸引,其實佢仲有四個兄弟姐妹,大哥叫令路線、二哥叫令政策、四妹叫令方針,五弟叫令完成。咁佢地個咁潮名究竟點嚟架呢?係佢老豆令狐野睇報紙學番嚟。
係!無錯佢老豆係姓令狐野,唔係令野,佢地原本係姓令狐,令只係簡化,強國人改名只要唔違反法律嘅強制性規定,基本上係任改,所以令計劃個仔係叫令谷,但佢大哥對仔女就叫令狐劍同令狐燕。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載