› 選擇地區
三藩市
紐約
洛杉磯
其他美國地區
香港 台灣 北美
 
2014年12月24日

中環在線:萬達掛牌 暗角撐老竇仍搶鏡
王健林獨子狂被集郵 - 李華華

王思聰噚日不停被集郵,雖然一路冇Say No,但張張相都好鬼Cool。

大連萬達商業地產(3699)噚日掛牌,中國前首富王健林作為大股東當然係傳媒追訪對象,但要講受女人歡迎嘅程度,肯定唔及佢26歲嘅獨子王思聰。呢位被稱為中國最有米嘅富二代,噚日現身交易大堂,全程匿埋一角,不過都被多名眼利嘅女人發現,紛紛埋去集郵。

王思聰噚日佢冇帶新女友出現,亦冇高調咁傍實爸爸側面,喺大約半粒鐘嘅上市儀式,佢都只係企係角落頭,冇搶風頭。但呢位富二代魅力沒法擋,吸引場內唔少女人走埋去要求合照,不停被集郵。唔知係咪慣晒呢?佢一路冇Say No,不過無論佢同邊位影相,都係冇乜表情,Cool爆!

被人瘋狂集郵都不特止,原來有粉絲喺微博幫王思聰開咗個「王思聰新聞直播間一號演播大廳」,佢出席上市儀式嘅相,喺個幾鐘頭內就俾粉絲上載晒。仲有大量佢出席其他活動嘅相,任睇唔嬲。呢位粉絲仲喺微博幫埋萬達做宣傳,認真唔話得。睇嚟王思聰就算名草有主,仍然有好多女士對佢有興趣喎。

太太簡約現身冇土豪味

寶貝仔撐場之餘,又點少得王健林嘅太太林寧呢。呢位闊太噚日嘅打扮一啲都唔浮誇,亦冇土豪味,簡單以一身淺色外套襯絲巾現身,斯文大方,唔講都唔知佢係主人家。當王健林應付傳媒提問嗰陣,佢就喺台上同其他嘉賓影合照,笑到鬼咁開心。至於王健林,提到佢未能重奪首富,佢就話自己連𠵱家係第幾富都唔知喎,表面上好唔志在首富名銜囉。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載