› 選擇地區
三藩市
紐約
洛杉磯
其他美國地區
香港 台灣 北美
 
2015年01月09日

中環在線:超人與學生潮玩selfie - 李華華

超人李嘉誠旗下李嘉誠基金會跟以色列理工學院合辦「科技夾子營」,邀請本港約80名師生同傳媒去以色列,參觀當地startup公司,呢個團噚日終於出發,正當大家傍晚喺機場整裝待發時,超人與紅顏知己、基金會話事人周凱旋忽然現身機場送機,即刻被瘋狂集郵,引來一陣騷動。
超人好識做,即場戴番頂團帽,班學生哥見到超人仲開心過見到解款車跌錢,超人亦主動走埋去同大家合照,夠晒親民。
學生哥見機不可失,爭住同超人玩selfie(自拍),超人來者不拒,有學生畀個手機佢揸住玩自拍,佢都冇say no,但搞到場面越嚟越混亂,要在場工作人員叫停。
最後超人就叫大家「大家睇多啲,諗多啲,have a fun,希望你哋好高興返嚟」,全程逗留10分鐘左右,就同周凱旋離開。之但係,周凱旋明明話會一齊去以色列,佢冇隨團出發,估計應該係坐私人飛機嘞。
講番呢個為期6日嘅以色列團,雖然話係「科技夾子營」,但唔係日日齋睇startup公司咁悶嘅,行程頭兩日嘅節目仲別具特色㗎。

以色列團去沙漠工作坊

團友到埗後,先要參加反恐訓練,各團友需要學習反恐知識同埋學習以色列國粹功夫Krav Maga,最勁係有模擬射擊訓練,下午再去沙漠工作坊,騎駱駝兼學習沙漠求生技巧。希望周凱旋到時玩埋一份,等大家一睹佢開槍同騎駱駝嘅英姿喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載