› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

每日一趣:強國版MPF啟動 - 李可強

強國版MPF首先係員工供款比例高達8%,僱主供20%,合共達28%。 資料圖片

國務院噚日啟動「養老金並軌」,簡單嚟講,即係要求公務員同事業單位(類似香港公營機構)員工,全部要自己供番退休金,涉及人數多達四千萬人。打個比喻好似殖民時代香港公務員退休靠長俸,回歸後全部轉做供強積金。根據香港經驗,MPF會益晒保險公司同芬佬,難怪噚日內險股大升,但幾年後,香港社會民意對MPF怨聲載道,媽聲四起,唔知向來重視維穩嘅阿爺,有冇考慮呢點?
強國版MPF比香港版要狼好多,首先係員工供款比例高達8%,僱主供20%,合共達28%。僱主供20%嗰部份,員工退休後冇得落袋,政府屆時按當地平均工資計數派錢,金額就與之前供款基本冇關。
而家內地啲養老金,全部交由民政局打理,時不時傳出有地方政府挪用醜聞,第日能否全數領取,真係唔知。資金又只能買國債或擺銀行收息,大幅跑輸通脹。內地改革下一步,好順利成章係要交由保險公司管理,再做投資,跟足香港MPF制度。
不過,內地新養老金制度仲好輸蝕,公務員首先要扣起8%人工,將來可以攞幾多又唔知。到咗第日養老金真係入股市,以A股風高浪急程度,一個唔覺意輸鋪勁,到時反阿爺最激嘅,可能就係啲公務員。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載