› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

中環在線:齊齊戴Hermès襯到絕
四大富婆做「絲巾交」 - 李華華

四位阿太齊齊為保良局出力;左起梁安琪、朱李月華、郭羅桂珍及蔡李惠莉。 何家達攝

噚日真係星光熠熠耀保良!恒地(012)主席李兆基(四叔)親自宣佈將私人一幅元朗農地,捐畀保良局做青年宿舍。為隆重其事,保良局八位總理齊現身,幾乎逼爆四叔嘅會議室,但同時造就四位《福布斯》富豪阿太嚟張大合照。四位阿太仲要圍住同一款Hermès(愛馬仕)絲巾,好鬼襯,唔知佢哋會後有冇約埋去打番四圈呢?
大家對呢四位城中闊太一定唔會陌生,佢哋經常喺馬經、財經同娛樂名人版出現,噚日佢哋唔係喺ball場或馬場聚頭,而係一齊走上去恒地位於中環國金嘅寫字樓搵四叔。

相關新聞:中環在線:四叔窩心 向記者送馬油

四太傍住四叔好貼心

四叔捐地畀保良局,其中一個重要人物當然係保良局董事會主席,即係賭王四太梁安琪。四太仲傍住四叔出嚟,全程都表現得十分尊重四叔。金利豐(1031)老闆娘朱李月華係四太手帕交,加上佢係保良局副主席,盛傳下屆極有機會接替四太做保良局主席,當然要出現喇。
莎莎(178)老闆娘郭羅桂珍與「玩具大王」蔡志明太太蔡李惠莉雖然冇乜出聲,但係都set行頭、化行妝現身,好畀面㗎。蔡太本身開辦幼稚園,特別溫文。
有冇發現四位阿太頸上面圍住同一款式嘅絲巾呢?原來呢條絲巾係四太舊年年初擔任保良局主席時,買嚟送畀其他女總理嘅,男總理就有橙色領帶,全部都係Hermès。據講,呢款Hermès絲巾大約四千幾蚊,物「輕」情義重,四太應該係想保良局一班總理每次都可以襯晒咁出席活動,顯示佢哋成班人都好齊心為保良服務。
如果朱太真係成為下屆主席,唔知佢會送乜呢?

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載