› 選擇地區
三藩市
紐約
洛杉磯
其他美國地區
香港 台灣 北美
 
2015年01月19日

中環在線:白色做底色 圖案簡約
渣馬Tee唔再青BB - 李華華

特步已經係第四年贊助渣馬跑衫。

一年一度嘅渣打馬拉松係嚟緊嘅星期日舉行,啱啱嘅周末跑手拎到選手包,見到內地品牌特步(1368)贊助嘅跑衫,今年終於冇用渣打主色──肉酸嘅藍綠色做配色,順眼咗好多喎。

相關新聞:中環在線:李寧港開舖唔掂 特步有辦睇唔急進

衫背後印路線圖

今年件衫以白色做底色,前面印咗中環主要大廈嘅外形線條,一睇就話認得出有中銀同IFC,但係主人家渣打個棟呢?就唔多認得到喇。至於衫後面就印咗成個馬拉松嘅路線圖,連配給地點、唔同賽事嘅路程都可以一睇眼晒,睇嚟設計係刻意方便跑手喎。
唔講唔覺,特步已經係第四年贊助大會跑衫。仲記得特步二零一二年第一年贊助嗰件跑衫,又藍又綠,俾人勁彈話似足「史力加」上身,上年就以漸變藍做主題,已經好過第一年好多。
形象設計師張學潤(Nel Nel)就覺得件衫冇乜特別:「都係一般大會T-shirt啦,圖案簡潔乾淨得嚟,又貼題囉!」咁唔知跑手會唔會跑完渣馬之後都着足成年呢?
特步首席財務官何睿博就話,同渣馬係舊年簽咗為期三年嘅約,即係話下年特步依然會係大會跑衫贊助商。佢仲話,合作得好又冇理由畀佢停。原來公司覺得贊助渣馬,可以幫到手提升品牌形象喎。
今年特步仲係中環港鐵站落咗個有代言人謝霆鋒嘅廣告,宣傳贊助渣馬呢件事,何睿博仲話遲啲會幫霆鋒整返個「鋒」系列嘅產品。不過,點落廣告都好,佢話公司使落市場推廣條數只會佔營業額約12%,唔會太多喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載