› 選擇地區
三藩市
紐約
洛杉磯
其他美國地區
香港 台灣 北美
 
2015年01月19日

康樂大廈:霍大班降班? - 何淑茵

霍建寧加入長江集團近三十六年,絕對是公司的老臣子。   資料圖片

長和重組最令我感興趣是新公司的人事安排,從董事名單來看,核心老臣子都全部成功過渡,但幾乎無傳媒提及的是「打工皇帝」和黃董事總經理霍建寧(Canning)疑被降le,在新長和入面,霍大班仍是董事總經理(簡稱MD),但中英前面多了兩粒字(母)「聯席」(Co)。試問當今世上,仲有邊個可以同Canning聯席?原來係大公子李澤鉅(Victor),佢做co-MD之餘,繼續做長和副主席。
Canning名符其實是老臣子,加入長江近三十六年,一九八四年升做和黃執董,Victor當時仲喺美國讀大學,翌年先加入長實。一九九三年霍建寧升le做大班,兩年後Victor才升做和黃執董,又等到九九年先坐上和黃副主席。有參與過和黃十年前一宗大型收購的banker形容,鉅、霍兩人坐低傾刁時,都係由霍一輪嘴講晒,鉅少偶爾點頭示意,但不會搭嘴。
李嘉誠宣佈重組當日,話要鋪好條軌給李澤鉅接棒,還意味深長話:「(自己退休後)我相信我哋(在場)呢度高層個個都喺度」,似與老臣子傾好數全部留低,但澤鉅係咪都咁諗先?
Victor屬龍,又係獅子座,注定是強勢獨裁的領導者,據聞多年來佢主力長實及長建,和黃就由Canning睇場,所有高層都知最後話事係李嘉誠,所以一直相安無事。不過咁,Victor坐正之後如何與牙擦擦的霍建寧相處,將是中環花生友最期待的戲目。

何淑茵
mailto:noelsyho@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載