› 選擇地區
三藩市
紐約
洛杉磯
其他美國地區
香港 台灣 北美
 
2015年01月20日

吳系講股:成手蟹貨 可以點搞 - 吳家順

內地A股急跌,預料春節前亦難再創新高。 資料圖片

「路遙知馬力,日久見人心」,不知道是哪位高人的創作,實在太奇妙。上周本欄指出「當局者迷,不如抽身離場」,並講到明已大量套現,當時筆者將絕大部份A股相關股份沽出,還被人笑我儍,其實筆者都不知道是升是跌,只不過評估過當時所知的情況,再經過精密計算,看看值博率罷了,此刻大把現金,掃貨唔掃貨好呢?!

最低位斬倉有原因

A股急跌,我們可以從事件性質去分析,滬綜指由去年的2300點水平至今的上升近一千一百點,其實從來未有正式調整過,基本上是橫衝直撞地抽升。假如這股亂衝亂撞的力量持續下去,到時4000點才震盪到3000點,肯定震死好多人,如今中證監在上周五收市後公佈,叫停三間證券商的新開融資融券業務三個月,明顯只是想為行情稍稍降溫,若然是落重藥,就會一籃子一刀切,既然不是如此,就只是降溫,既然是降溫,中線就唔需要擔心!
「唓!你走晒貨當然唔使擔心啦,我無聽你講而家成手蟹貨,可以點搞?」如果心目中有這條問題,其實就要問自己,為甚麼成手蟹貨?是不是用孖展?還是用現金?事實上,好多時問問題的人本身已經有答案,只是想一個神仙向佢講出對佢最有利的情況,但事實絕不能盡如人意。如果本身的資金鏈極為緊張,斬倉就一定要斬得狠,這樣才可留一條活路給自己,有了活路才有「覆啅」的條件,否則就如筆者早前講過,大牛市前已被震死,大牛市根本跟自己無關係。而我們腦海中總會猶豫,斬不斬呢?這條問題應該在買入後的一小時內先找答案,有了答案就不要再問,只要跟着做便可。
如果是持有現金,就問一問自己,A股在春節前都不容易再創新高,反彈力度也是不知道的,有無問題!如果無問題,就繼續持有吧(因為斬倉的最佳時間,應該是昨天早上)。最怕就是自己呃自己,明明自己貪心,就唔想認,明明無乜孖展守,就希望明天即刻好,這種情況最常見的結果,就是在最低位斬倉,然後反彈!筆者常說,「唔痛點叫做斬倉呀」。
廢話不多講,幾時再買貨?上周跟炒掃贏瑞士法郎之後,掃咗兩隻中價錶,這兩日想掃多隻平價錶,本身死窮鬼出身,點識玩錶咁高檔,只是去年的人民幣竟然都要輸錢,今年不如留兩三隻錶好過。

春節前難再創新高

吓!唔係問幾時掃錶?係股票。股票心目中有藍圖,到時候筆者自然會有提議,既然知道A股在春節前不容易再創新高,那麼着力點就不會在春節之前,而春節之前做甚麼,股票市場倉位呢……賣個關子,可以繼續留意本欄。至於錶呢,要掃就好掃,如果鐘錶唔會加價,鐘錶股就唔會跌啦,貪得意咩,講講吓掃多隻先。先申報,筆者鄉下仔得兩至三隻錶仔,拿出來都會俾人笑……仲要喺度公開講,真失禮。
本文最後,先預告今年請小朋友睇戲的日子及電影已定,是二月二十八日大年初十,電影是大人同小朋友都啱睇嘅卡通片,呼之欲出吧,地點待筆者再定。人微言輕,暫時資金力量只夠請一場戲,若突然間有好多善長人翁彈出來就好啦,一起支持就好啦。
一直希望今年若有能力可以搞得好一點,受惠的小朋友就可以更多,但話說筆者曾試聯絡過各大院線,希望可以在某一天早場作一點贊助,如平二十元或每位一份細免費爆谷、汽水咁,可惜得到零回應,故唔買這類股份是正確的,星期六上午十點的入座率未必有三成,我包晒全場,其實對電影院除笨有精,咁都唔理我!我只係想請小朋友睇戲的低能仔啫!

吳家順
中國銀盛資產管理董事、Mensa會員
http://www.facebook.com/1234567.com.hk
本欄逢周二刊出

筆者為證監會持牌負責人,申報於本文章刊登之時,筆者個人並沒持有此股票相關權益,而中國銀盛資產管理的基金客戶也沒持有相關股票權益。證券價格可暴跌不升至毫無價值,招致損失,投資者及客戶應審慎,並在作出其投資決定時應僅視本文為眾多考慮因素之一。本文所提供的建議未必適合所有投資者,作者合理地認為所提及的資料在公佈時是準確的,但並不保證(明確或暗示)該等資料的準確性。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載