› 選擇地區
三藩市
紐約
洛杉磯
其他美國地區
香港 台灣 北美
 
2015年01月20日

金手指:救香港 反停板 - 孫柏文

筆者成立咗個fb group,叫「反停板」。 互聯網

左膠、學者等都好鍾意話:「劣幣驅逐良幣!」就咁講時完全唔make sense,因永遠都講漏下聯「如果劣幣同良幣嘅價值掛鈎的話」。即係點解?兩個小朋友準備上台表演,一個準備充足,就算未做到青姐胡孟青嗰句「台上一分鐘,台下十年功」,連月認真排練。而另一個?就典型現今準備。
表演當日認真排練嘅小朋友上台先,一演完,全場被表演感動到掌聲如雷。到典型準備嗰個演完時,全場集體睇手機,主持有見及此,音樂都未完已嗌:「畀啲掌聲鼓勵吓小朋友啦!」跟住就聽到掌聲。

做足功課者贏好合理

我呢啲甘草財演,當然知邊種掌聲係堅邊種係hea拍。但認真排練嘅小朋友聽到第二個嘅掌聲時,忍唔住問身邊媽媽:「點解佢演成咁都咁多人拍手嘅?」你估呢位小朋友下次仲會唔會認真準備?
咁同孫柏文反停板制有乜關係?睇青姐同David Webb,佢兩都支持,青姐仲引用早排比亞迪(1211)被斬倉為例話:「若當時有五分鐘冷靜期,經紀可以去收吓料做反應。」嗰日比亞迪冧市,跌穿廿蚊嗰刻,我打畀比亞迪頭號fans火燎森。佢一執起電話就:「遲啲傾,轉緊倉買比亞迪。」佢點解咁有信心?因對比亞迪滾瓜爛熟。嗰日阿火贏大錢,青姐口中經紀啲客輸,就係香港成功嘅原因。
港式資本分配要有效率,需要啲做足功課嘅人贏,未做足嗰啲輸。去保護啲要收吓料先做反應嘅人,對做足功課嗰啲公平咩?大陸呀?不如將青姐邏輯伸延,一停停兩日,連睇紙版《蘋果》嘅讀者都收齊料先復牌?停板制就係「畀啲掌聲鼓勵吓啲小朋友啦!」
我會組織反對活動,但要先集齊人。我成立咗個fb group叫「反停板」( http://www.facebook.com/stoptradinghalt )。沈振盈、高明、利世民、黃世澤已加入。日日話this city is dying。今日問大家,想唔想轟轟烈烈打一次反擊戰?

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載