蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月27日
馬上成為壹會員

中環在線:滙豐「地圖」周四揭幕
石磚鋪砌 賀150周年 - 李華華

滙豐中環總行地面𠵱家有帳篷圍住,原來內有乾坤。
李潤芳攝

中環人近月經過滙豐總行地下行人通道,有冇發現成日有帳篷圍住某啲地方呢?內裏乾坤將於本周四揭曉嘞。聞說滙豐為慶祝在港成立一百五十周年,喺呢度設計咗一幅用石磚鋪砌嘅百五周年紀念地圖,滙控(005)行政總裁歐智華周四就會為呢幅地圖揭幕。
今年三月三日係滙豐銀行慶祝在港成立一百五十周年嘅大日子,獅子行除咗發行百五年特別版紀念鈔票外,佢哋亦喺中環總行大堂地下中央,設計咗一幅用石磚鋪砌嘅百五周年紀念地圖,貫穿地下行人通道。

歐智華主持儀式

華華側聞,呢幅地圖嘅設計概念,係用一張古舊嘅南中國沿海地圖,滙豐環抱其中,寓意獅子行百五載,跟香港同埋呢個地區同行。有關工程自舊年佔中前已經展開,幾個月嚟,滙豐一直圍封住地下公用走廊通道,保持設計嘅神秘感。
歐智華本周四就會現身,主持呢項紀念設計揭幕儀式,亞太區行政總裁王冬勝應該亦會陪同出席。據講歐智華上星期已人在香港,並現身中環。
事實上,佢對香港應該好有感情,事關佢嘅事業係由香港起飛。九十年代初,佢由日本調來香港主持炒房,在港發展平步青雲,二○○三年離港赴倫敦,扶搖直上,二○一一年初,掌舵集團行政總裁,當時年僅五十二歲。佢早年喺半山買入豪宅,曾經喺訪問中透露,他日退休亦會選擇居於香港㗎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載