蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月28日

中環在線:劉華手勢 雷軍照抄
擺招牌V 字 粉絲學偶像 - 李華華

雷軍(右圖)近排俾人發現好鍾意做V字手勢,似足偶像劉德華。

小米創辦人雷軍係劉德華(華仔)嘅粉絲!雖然雷軍成日俾外界形容為「雷布斯」,但係原來佢最崇拜嘅並唔係已故嘅「蘋果教主」喬布斯,反而係香港「民間特首」劉德華,難怪佢舊年喺全城冰桶挑戰,點名挑戰偶像,早排喺新產品發佈會,又學華仔嘅V字手勢喇。
聞說雷軍多年嚟都係華仔嘅忠實粉絲,但兩人喺舊年先至互相認識,當時華仔去北京清華大學宣傳新電影《風暴》,雷軍就主動去撐場,仲安排咗一場同偶像嘅公開對談。
雷軍當時為咗隆重其事,唔單止喺自己微博預告話「很期待」,仲call齊自己粉絲集思廣益,「我會見到劉德華。大家建議我問甚麼問題?最好是上檔次並且接地氣的問題」。

相關新聞:中環在線:小米專門店下季登陸香港

與偶像對談 坐姿僵硬

結果喺呢場座談會上,呢位小粉絲喺偶像面前,坐姿幾乎完全僵硬,當晚佢仲自嘲表現太緊張,又話唔敢開口邀請華仔一齊合照,搞到要請同事搵在場記者,畀番幾張現場合照佢珍藏。
唔知係咪受到偶像薰陶,近排雷軍嘅動作很劉華,兩星期前嘅新款手機發佈會上,佢就喺台上用華仔嘅招牌V字手勢,同台下嘅「米粉」玩selfie合照,笑嘅時候都一樣有魚尾紋㖭呀!
雖然雷軍咁鍾意華仔,但就冇打算搵劉德華做代言人喇,因為公司上下都覺得雷軍呢位老闆先係最好嘅代言人。
話時話,中國科網界大佬都幾鍾意追星,除咗雷軍之外,阿里巴巴創辦人馬雲就出名多明星朋友,搵到趙薇、李連杰、王家衛等人撐阿里影業(1060),而騰訊(700)主席馬化騰亦搵嚟歌神張學友合作,喺中國獨家開賣對方嘅新專輯。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載