› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

魚樂無窮:倍升股是怎樣煉成的 - 唐牛

噚日升幅榜中,雅天妮質地最好,升13%。圖為集團主席謝海州。 資料圖片

唐牛今日化身鄰居魏力,從異動空間搵好股,噚日升幅榜中,以升13%嘅雅天妮(789)質地最好,絕對係倍升股嘅好材料。點解咁有信心?簡單講吓公司背景︰雅天妮主要設計產銷配飾,擁有自家品牌,創辦人謝超群夫婦三年前是非不絕,有指謝超群患有精神病,又與妻子葉英琴反目,經過一輪擾攘後,由謝超群弟謝海州接管打理。公司隨即有一連串動作,先嚟大折讓八成供股,集資1.8億銀,然後出售紅磡兩個辦公室單位連停車場,以及CDM配飾業務,套現共五千萬,簡單幾個動作,已經有2.3億揸手。最吊詭係公司最新淨負債僅一千萬,完全唔似有咁龐大嘅資金需求,做咁多嘢想點?聰明嘅戰友腦海只會浮現兩粒字︰賣殼!
試想想,創辦人先後退下火線,業績每況愈下,易手係公司唯一出路,連環動作明顯為淨身。雅天妮最新市值3.2億,當中現金佔2.3億,嘩!殼價只值九千萬?原來早前供股有大手超額認購飛,令大股東供乾貨源如意算盤打唔響,成為市價未能反映真實價值嘅關鍵。不過, CCASS顯示本月中44%貨射咗落國泰君安,呢批貨肯定屬於大股東,無緣無故拎出嚟,你估謝生好似唐牛咁得閒咩,加上股價噚日突然起動,相信好事近了。呢鋪如果傾得成,用七億市值做目標,講緊要升1.2倍,留意仲未完全反映殼價㗎!

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載